Ads by Google Ads by Google

Fa’asala e le Fa’amasinoga Maualuga ia Pierce Suapilimai i le Toese


[ata: foa'i]
ausage@samoanews.com

E 40 masina lea ua fa’asala ai e le Fa’amasinoga Maualuga le susuga a Pierce Suapilimai e nofosala ai i le Toese i Tafuna, ina ua ta’usala o ia i moliaga o lona umia faasolitulafono o fualaau fa’asaina.

 

O le fa’asalaga faa falepuipui mo Suapilimai o se tasi lea o tuutuuga o lana nofovaavaaia e 5 tausaga.

 

O le vaiaso na te’a nei na tuuina atu ai e le Fa’amasinoga lana faaiuga, i le mae’a ai lea ona ta’usala o le ua molia i moliaga mamafa e 3 sa ia ioeina, i lalo o se maliliega na latou sainia ma le malo.

 

Talu mai lava le taimi na taofia ai Suapilimai i le toese, e le i tatalaina lava i tua, ina ua le mafai ona ia totogi le tupe e $50,000 na fa’atulaga e le Fa’amasinoga.

 

E 2 tagi eseese na ulua’i tu’uaia ai e le malo ia Suapilimai

 

I le tagi muamua, na tu’uaia ai le ua molia i moliaga mamafa e 3, lea e aofia le umia faasolitulafono o le pauta o le aisa ma le fa’amoemoe e tulei ma fa’atau atu i isi tagata; faapea ai ma le moliaga mama e tasi o lona umia faasolitulafono lea o se aupega.

 

Ae i le tagi lona lua, na tu’uaia ai o ia i moliaga mamafa e lua, le moliaga o le umia faasolitulafono o vaega o le laau fa’asaina o le mariuana, faapea ai ma le moliaga o le gaoi.

 

Ae i lalo o le tagi na sainia e le ua molia ma le malo, lea fo’i na talia e le Fa’amasinoga, na malie ai Suapilimai e tali ioe i moliaga e 3, ae solofua ai loa isi moliaga o lo’o totoe.

 

I le tagi muamua, na malie Suapilimai e tali ioe i le moliaga muamua o le umia faasolitulafono o vaega o le pauta faasaina o le aisa ma le faamoemoe e tulei ma faatau atu i isi tagata, faapea ai ma le moliaga lona 3 lea na toe teuteu e le malo, le moliaga o lona umia faasolitulafono o vaega o le laau fa’asaina o le mariuana.

 

Ae i le tagi lona lua, na malie ai Suapilimai e tali ioe i le moliaga muamua lea na toe teuteu e le malo lona mamafa, ina ia fa’ailoa ai le moliaga o le umia faasolitulafono o mariuana.

 

I le tali ioe ai o Suapilimai, sa ia ta’utino ai e fa’apea, i le aso 10 o Setema 2017, na ia umia faasolitulafono ai fualaau fa’asaina o le aisa ma le faamoemoe e faatau atu i isi tagata, faapea ai ma lona umia faasolitulafono o mariuana.

 

Na ta’utino atili le ua molia e fa’apea, ina ua osofa’i e Leoleo le fale sa i ai o ia i le aso lea, na maua i ai e Leoleo fualaau fa’asaina ma vaega uma e lagolago ai lana pisinisi fa’atau fualaau fa’asaina.

 

O isi mea na maua e Leoleo e aofia ai pepa e utu i ai fualaau fa’asaina, o sikaleti mariuana, o se tinoitupe, o straw, faapea ai ma se api sa faamaumau ai gaioiga uma sa faia mo le fa’atauina atu o fualaau fa’asaina i tagata lautele.

 

Ae i le tagi lona lua, sa ia ta’utino ai e fa’apea, i le aso 16 o Aperila 2018 a o tatala ai o ia i tua e faatalitali ai taualumaga o lana ulua’i mataupu, na taofi ai e Leoleo lana ta’avale ina ua ia le usitaia tulafono o le alatele.

 

Na su’e e Leoleo lana ta’avale ma lona tagata, ma maua i ai ni sikaleti mariuana se 2 ua uma ona taai.

 

Ina ua maua le avanoa mai le Fa’amasinoga, na talosagaina ai loa e le loia a Suapilimai ia Ryan Anderson le Fa’amasinoga mo se fa’asalaga faanofovaavaaia mo le ua molia, ina ia maua ai le avanoa e tatala ai o ia i tua e faigaluega ma fesoasoani i le tausiga o ona matua.

 

O Suapilimai e pei ona taua e Anderson, o se ali’i sa lelei lona aoaoina i lona olaga, ae ua faaletonu lona olaga i le sese o le filifiliga ua ia faia. O ia o se tagata e alofa i ona matua ma lona aiga, ma ua ia lagona fo’i lona salamo e tusa ai o lana solitulafono sa faia.

 

E ui i manatu o nisi i le pisinisi fa’atau fualaau fa’asaina sa faatautaia e Suapilimai, peita’i na finau lana loia i le Fa’amasinoga e faapea, e le o se pisinisi tele na fa’atinoina e le ua molia, pe a fa’atusatusa atu i isi fo’i ituaiga pisinisi faapenei i le atunu’u, o lo o tulei ma fa’atau atu ai fualaau fa’asaina.

 

Na taua e Anderson e fa’apea, na mafua ona fa’atinoina e le ua molia lenei tama’i pisinisi, ona o se taumafaiga e maua ai se tupe mo ia lava. Na taua atili e Anderson e fa’apea, e le o se alofaga o lo o ia taumafai e faaleo, ae o le mea moni lava lea e fa’atatau i le pisinisi sa aafia ai le ua molia.

 

I le faaiuga o lana folasaga, sa ia talosagaina ai loa le Fa’amasinoga, ina ia fa’aaoga masina e 16 lea ua mae’a ona tuli e Suapilimai i le toese e fai  ma ana faasalaga, ae tuuina atu se faasalaga faanofovaavaaia ia te ia.

 

E le i finagalo le ua molia e fa’aleo sana talosaga i luma o le Fa’amasinoga.

 

Na teena e le Loia a le malo le faafinauga a le itu tete’e, fai mai e laititi le pisinisi faatau fualaau faasaina na faatinoina e le ua molia. Na taua e le tama’ita’i loia sili lagolago ia Christy Dunn e fa’apea, e le sa’o lea fa’amatalaga, ona o mea sa maua i le osofaiga a Leoleo na atagia mai ai, e tele atu le pisinisi faatau fualaau fa’asaina a Suapilimai nai lo le mea o lo o manatu i ai lana loia fautua.

 

Na talosaga Dunn i le Faamasinoga ina ia faasala le ua molia i se fa’asalaga faanofovaavaaia, e aofia ai ma lona tuliina o le umi e 20 masina i le toese pe afai o le finagalo lea o le Fa’amasinoga, o lona tuliina lea o se umi faapea i le toese i Tafuna.

 

A o le i tuuina mai le faaiuga a le Fa’amasinoga, e tele ni saunoaga a le afioga i le alii Fa’amasino ia Fiti Sunia e uiga i lenei mataupu.

 

Saunoa Sunia e fa’apea, atonu e manatu le loia a Suapilimai e laititi le pisinisi fualaau fa’asaina sa faatinoina e le ua molia, ae o le silasila a le Fa’amasinoga e tusa ai o mau faamaonia sa folasia e le malo, e le laititi le pisinisi sa faatinoina e le ua molia.

 

“E leai se mea e ta’u o se tama’i pisinisi fualaau fa’asaina,” o le saunoaga lea a Sunia. “E tutusa uma lava pisinisi e faatau ai fualaau fa’asaina, pe tele pe laititi, e tutusa uma lava lo latou aafiaga i olaga o tagata o le atunu’u.”

 

Na faamanino atili e Sunia e fa’apea, o le pisinisi lenei mo le fa’atauina atu o fualaau fa’asaina, e mafai ona tupu ma avea o se pisinisi tele pe afai e to’atele tagata latou te fa’atauina ma fa’aaogaina fualaau fa’asaina.

 

O le taimi lava e iloa ai e le tagata e ana le pisinisi ua ola ma tupu lana pisinisi, ina naunau fo’i lea o ia e fa’a to’atele tagata latou te tuleiina atu le fualaau fa’asaina.

 

“E leai la se mea e ta’u o se pisinisi laititi, e le tatau foi ona tatou taumafai e faalaititi le tulaga matuia o lenei ituaiga solitulafono,” o le saunoaga lea a Sunia.

 

Mo moliaga uma e 3 e pei ona ta’usala ai le ua molia, ua faamalumalu e le Fa’amasinoga le tuuina atu o ia i le Falepuipui mo le ta’i 5 tausaga i le moliaga e tasi, ae ua faanofovaavaaia o ia mo le 5 tausaga i lalo o tuutuuga e ao ona ia usitaia.

 

O ni isi o ia tuutuuga e aofia ai lona tuliina o masina e 40 i le falepuipui, e faitau ai ma masina e 16 lea ua mae’a ona ia tuliina, totogi le salatupe e $5,000, ma ia aua fo’i nei ona toe tagofia ni fualaau faasaina poo le ‘ava malosi.