Ads by Google Ads by Google

Fa'alauiloaga Galeuga a Tausima'i - Tima'iga, Folasaga & Tautua a Tausima'i


O se va'aiga i le galuega fai a tama'ita'i Tausima'i i so'o se taimi e faia ai talavai. [ata: Leua Aiono Frost]

I le taeao o le aso Faraile na te'a nei, na fa'atumulia le Maota i le Malae o Su'igaula i Tamaita'i Tausima'i Pasi, mai le falema’i o le LBJ i Fagaalu, fa'apea ma le Nursing Department a le Kolisi Tu’ufa’atasi (ASCC) e fa'alauiloa matafaioi o lo'o fa'atino i aso ta'itasi e tautuaina le mamalu lautele o le atunu'u.

 

O lea taeao sa loma mo le vasega o Tausima'i e fa'atautaia ai siakiga o le soifua maloloina o tagata lautele e afea lea fa’atasiga, ma tima'ia ai i latou e ala i le iloa lelei o tausami e ao ina taumafaina mo le tausiga lelei o le soifua maloloina.

 

Sa tapena mai fo'i ma le tele o 'aiga masani ona fiafia i ai le to'atele, o taumafa Samoa, aua le malu taeao. Ua faia ai ma folasaga e fa'atatau i gasegase tumau ua maua ai le to'atele o tatou tagatanu'u, ae maise o fa'ama'i fo'i nei ua iloga ona tumati'e ai le faitau aofa'i o Amerika Samoa ua maua ai i le lalolagi atoa.

 

Pe afai e te ulufale atu i lenei tautua sa fa'atino e tama'ita'i  ma Ali'i Tausima'i Pasi fa'atasi ma o latou  Faia'oga ma le Pulega, e amata atu loa ona fua lou toto, fa'ailoa ia te oe le maualuga ua i ai, ma fa'amalamalama fo'i ia te oe lena faitauga.

 

Afai ua iloga mau ua amata ona maualuga o lou toto, ua fautuaina fo'i oe iina, i le mea e ao ina e faia, ae maise ai lava o ituaiga taumafa e tausia ai lou tino, fa'atasi ma taumafa e le tatau ona tagofia. E fautuaina fo'i o oe ina ia fa'amalosi tino.

 

A mae'a ona fua lou toto, ona fa'asolo lea i le nofoaga e fua ai le suka i lou tino. E fia maua mai le maualuga o lou suka o i ai, ma e fa'amatala auiliilia fo'i ia te oe, lea faitauga o lou suka.

 

Afai e le o fa'apea ona tautuaina oe e tausima'i i so'o se taimi e te o'o atu ai i le Falema'i i Tafuna, Leone, Amouli ma Faga'alu, e mafai ona e fesiligia pe aisea ua le faia ai se vaega lava e tasi o tautua nei ua faia i lea taeao mo oe?

 

Pe afai e matauina ua maualuga pe maulalo fo'i lou suka, e faia loa le talanoaga a oe ma le tamaita'i tausima'i. Fa'ailoa ia te oe le mea e ao ina faia loa, ae maise fo'i o le mea e tatau ona e faia i le aso Gafua, o le usu atu lea i le falema'i e amatalia au talavai mo le gasegase o le suka, pe afai ua maualuga tele lou faitauga.

 

Afai o oe ua amata ona e fuafua tatau au mea'ai ona ua iloga ua maua au faitauga ua tulata ina maua tumau oe i le ma'i suka, e ao ina e fa'asolo i a'oa'oga ua fa'atulaga i le Maota lava lea e fesoasoani ia te oe, ia iloa lelei le meae ao ina faia. O a'oga o mea'ai e fa'aitiitia le taumafa so'o ai, ma mea'ai e fa'atele i lau 'aiga e tasi i so'o se taimi, fa'atasi ai ma le tausiga o lou tino i mea inu, o le suavai auli lava le meainu e tatau ona inumia i taimi uma.

 

O le to'atele o i latou ua inumia fuala'au ona ole gasegase o le Ma'i Suka, toe fa'aopoopo atu i ai ua maua fo'i i le toto maualuga, ua avea ma mea ua tele ai fuala'au e inumia, ae ua fa'aletele se suavai auli e inumia e tatafi ma fa'asuavaia ai pea nei fuala'au, lea ua faigata ona aoina atoa lea lapisi atoa e fatuga'o, ma ua fa'ateleina ai fatuma'a i le toto o le tagata soifua.

 

O le ala lea o le fa'alauiloa lava, ia tatau ona matua tele se aofa'i o le suavai auli e inumia e le tagatae to'atasi i le aso. Ua fa'apena fo'i ona faia folasaga e tusa o vae o e gasegase i le ma'i suka. Ua tatau ona to'aga i latou e fa'amama vae, peita'i o fautuaga, a'o le'i faia vai vevela e fufulu ai vae, e ao ina mua'i tu'u i ai lou lima pe le o vevela tele le vaivela, ina ne'i mu ai le pa'u o le vae ma fa'afaigata ona toe fa'ape manu'a na o e ma'i suka.

 

O le gasegase fo'i o le gugu, ua talanoaina, aua o le gugu e fai fo'i si tele o ana fuala'au e ao ina inumia. O le tausiga lelei o le soifua maloloina, o se mea e ao ina faia ma va'ai toto'a i fuala'au e tausia lelei ai oe, ia iloa taimi tonu e inumia ai, ma ia muamua lava faia se tausamiga, ma inu ia tele le vai e inumia ai fuala'au suka, gugu ma le toto maualuga i so'o se taimi e inu ai.

 

I le fa'atausiusiuga o le tautua a tama'itai Tausima'i Pasi i le Suigaula a le Atuvasa, e te o'o mai ai i le vaega o faia folasaga ma fa'aalia ata o galuega na faia e Florence Nightingale i tausaga o le taua, e tautuaina ai fitafita o taua o manunu'a ma lavevea leaga i le taua. O nisi fo'i o galuega lelei na faia e nisi o tausima'i moe ua i ai mana'oga tupito o le tino ua le atoatoa, ona ua soifua mai lava ua le atoa, pe ona o manu'aga i taua ma fa'alavelave fa'afuase'i.

 

Ae fa'aiu ane loa i le vaega o lo'o faia tui puipuia mo le Influenza. O le tui lea e tasi lava i le tausaga ona faia, ma e i ai a latou pepa tui ua taulimaina e mafai ona fa'ailoa ai le tui ua faia ma le tausga ua tuia ai oe. Afai o i ai pea lau pepa tui talu ona amata mai nei tui i le tausaga 2017, a mafai ona faia le soso'oga o au fa'amaumauga, peita'i a fai e leai, e faia loa lou tui o lenei tausaga ma amata ai sau pepa tui e te malaga ma oe, ae tatau ona fa'aalia i so'o se atunu'u pe ose a'ai e toe fa'amalosia ane nei tui ae ua e faamaonia ua mae'a ona faia lou tui lea.

 

O le fale'ie mo tausami ua fa'atulaga i fafo ane o le Maota, ma ua gasolo i ai le to'atele e fa'atau ai sina tausamiga mama mo le taeao a'o tatalia se laki mai le lulu ua faia, pe afai ua mae'a ona e fa'asolo i nofoaga ma folasaga e 4, ona fa'ato'a agava'a lea mo le se'i.

 

O lenei polokalama ua fa'aaogaina o se ala sili lea ona taua ua tapena i ai le vasega o Tausima'i uma o Amerika Samoa, ina ia tima'ia o tatou tagata uma i ala e tausia lelei ai lou soifua maloloina, ina ia tatou ulufale atu i le tausaga 2020, a'o maua pea le soifua maloloina e i tatou uma.