Ads by Google Ads by Google

Eseese molimau a le malo ma le itu a le ali’i o Manu Lefatia


[ata: foa'i]
ausage@samoanews.com

E eseese uma fa’amatalaga na tuuina atu e molimau i luma o le vaega iloilo iuga, a o fa’agasolo ai le fa’amasinoga autu o le susuga a Manu Lefatia, lea o lo o tu’uaia i lona taitaia lea o le tuliga ta’avale ma Leoleo i le vaveao o le aso 24 o Tesema 2017.

 

Na taua e molimau uma lava a le malo, o Lefatia lea na ia fa’afoeina le ta’avale na fai tuliga ma Leoleo, peita’i na taua e molimau e to’alua a le itu tete’e, sa i ai Lefatia i le po atoa o le aso 23 o Tesema ma faasolo atu ai ma le vaveao na sosoo ai o le aso 24 o Tesema i lona fale, e leai lava se taimi na alu ese ai o ia mai lona fale.

 

E 6 le aofa’i o molimau na valaauina i lenei mataupu. O ia molimau e aofia ai Leoleo e to’afa sa molimau mo le malo, ma ali’i e to’alua sa molimau mo le itu tete’e.

 

E ui i le eseese o le auala na faasoa mai ai e alii Leoleo na molimau a latou fa’amatalaga tauto i le taimi na fesiligia ai o i latou, peita’i na autu uma a latou molimau i le manatu e tasi, o Lefatia lea sa ia faafoeina le ta’avale lanu mumu na fai tuliga ma Leoleo.

 

Na taua e molimau uma a le malo e fa’apea, sa latou iloa atu i totonu o le ta’avale o Lefatia o loo ia faafoeina le ta’avale. E leai ma se molimau a le malo na talanoa ia Lefatia, se’i vagana ai lo latou iloa atu o ia mai fafo.

 

Na taua e molimau a le malo e fa’apea, ao tiute le ali’i Leoleo o Justin Thomsen i luga o le auala i Vaitogi ma le ali’i Leoleo ia Capt. Lima Togia, na fa’afuase’i ona la vaaia se ta’avale SUV lanu mumu o aga’i mai i le itu i Sisifo i luga o le auala i Iliili, e aga’i atu i le itu o lo o i ai le malae va’alele i se saoasaoa e uiga ese le mata’utia.

 

Na faamatala e Thomsen e fa’apea, pe tusa ma le 70 maila i le itula le saoasaoa na alu ai le ta’avale. Sa ia vaaia fo’i le tipi e le ta’avale o isi ta’avale i luga o le auala.

 

O le taimi lea na tuliloa ai loa e Leoleo le ta’avale lanu mumua, ma e tusa ma le 6 ta’avale Leoleo ma Leoleo e toatele na auai i le tuliga ta’avale lea.

 

Ina ua oo atu le tuliga ta’avale i le auala e aga’i atu i le Fatuoaiga, na taua ai e le malo le alu atu o le ta’avale a Lefatia ma paka i luma o se tasi o faleoloa e tu i luma o le auala i Ottoville.

 

Na laga atu Leoleo ma valaau atu ia Lefatia e taofi le ta’avale ma sau i fafo, peita’i sa vaaia le ola pea o le ta’avale ma minoi solo, e foliga mai o loo fuafua e alu ese. E lei umi ona fai finauga a Leoleo ma le ave ta’avale, ae vaaia loa le toe aga’i ese atu o le ta’avale a Lefatia i se saoasaoa uiga ese, lea na toeiitiiti lava lavea ai le ali’i Leoleo ia Satia Leulu.

 

Na avea le saoasaoa o le alu ese atu o le ta’avale ma itu na le mafai ai e Leoleo ona tuliloa poo fea tonu le vaega o le auala ua aga’i ese atu ai le ta’avale. Na pau le itu na iloa e Leoleo, o le ta’avale a Lefatia lea na toe aga’i atu i luga o le auala a le malo ma fa’asolo atu ai lava i le Vaitogi.

 

Pe tusa o le 15 minute talu ona taumafai Leoleo e saili solo le ta’avale a Lefatia, ae fa’afuase’i loa ona toe vaaia lana ta’avale i le pito o le sami i le afioaga i Vaitogi, o lo o paka ai i luga o le malae mutia o lo o sosoo ma le sami.

 

Na taumafai le ali’i Leoleo ia Justin Thomsen ma le ali’i Kapeteni ia Lima Togia e poloka le auala ina ia le mafai ai ona alu ese mai le ta’avale a Lefatia, peita’i na mafai lava ona alu ese le ta’avale a le ua molia ma sao ese mai ai i Leoleo.

 

Ao lei alu ese mai le ta’avale a le ua molia, sa i ai se gaioiga mata’utia na tula’i mai i le taimi na fa’ataututu ai le ali’i Leoleo ia Thomsen ma le ta’avale a le ua molia.

 

Na taua e Thomsen i lana molimau e fa’apea, na fiu e valaau leotele atu ia Lefatia e tape lana ta’avale, peita’i sa fa’aauau pea ona fa’au e le ua molia le afi o lana ta’avale, ma foliga mai o lo o tau sola ese.

 

Ao faia finauga a le ali’i leoleo ma le ua molia, na vaaia e le ali’i leoleo le isi tagata o loo nofo i le nofoa o le pasese, e foliga mai o lo o gaioi solo o ia e tau saili se mea i totonu o le ta’avale. I le manatu o le ali’i Leoleo ia Thomsen, e foliga mai o loo tau saili e le ali’i lea se fana.

 

O lona fefe tele i lona saogalemu na mafua ai ona aapa loa i lana fana ma to mai i fafo, ma taumafai loa e fa’alala aga’i i lalo i le palapala ina ia faafefe ai le ua molia. Na i’u lava i lona faapa o le fana ina ia faautagia mai ai e le ua molia lana valaau atu, peita’i, e foliga mai e le popole lava le ua molia.

 

O le popole tele o le ali’i Leoleo i gaioiga sa faia e le ali’i sa to’alua ma Lefatia i totonu o le ta’avale, na mafua ai ona ia toe faapa le fana.

 

Na taua e molimau e to’alua a le itu tete’e ia Manono Faumui ma Sione Lagoia e fa’apea, o latou se ta’aalo piliati ma Lefatia i le latou Laulau Piliati i le po o lo o finau mai le malo sa ia faafoeina ai le ta’avale. E tusa ai ma mau na folasia e le itu tete’e, sa i ai lava Lefatia i lona fale i le po atoa lea, o ia fo’i sa vaaia Laulau Piliati a ona matua i lea po.

 

O le molimau mulimuli lava na valaau e le itu tete’e, o le ali’i Leoleo ia Det. Jimmy Tagata, lea na ia taua i lana molimau e fa’apea, o le ta’avale lanu mumu lea sa tuli e Leoleo, o se ta’avale rental mai le Faletalimalo a le Tradewind Hotel.

 

E to’afa i latou na tusia o latou igoa i le pepa na faamaonia ai le aumaia i tua o le ta’avale rental. O i latou e to’afa e aofia ai ali’i se to’alua ma tama’ita’i e to’alua. O ali’i e to’alua e aofia ai Faafetai Lefatia,o le uso lea o le ua molia.

 

Na fesili Uiagaleliei i le ali’i Leoleo ia Tagata, pe na maua i lana suesuega sa faia le i ai o le igoa o Manu Lefatia i le lisi o tagata na aumaia i tua le ta’avale. Na tali le ua molia, “E leai se igoa o Manu Lefatia sa i ai i le lisi o tagata na aumaia le ta’avale i tua.”