O LE PI O ME

O le pi o Me, e laititi, ae o se lagomeli e loto malosi toe uiga tausa’afia.  Mai lava i lona fanau mai, sa tele ni mea na tutupu i lona olaga.

O Me, o le pi mulimuli lava lea sa fanau mai i se faamoega pi o lo’o i se fale tu’ufua, i tafatafa o le vaomatua.  O le toatele ia o ona uso ma tuagane.  O le fa’atosaga o le faamoega pi, o le tamaitai o Lauama ma o se pi sili ona atamai.  Ma na silafia lelei lava e Lauama mai lava i le taimi na fanau mai ai le lagomeli o Me, o se manu e fiafia e su’esu’e.

Ina ua fanau ia Me, pe a ma le afa pi sa tu’ua le faamoega pi ina ia fa’aavanoa mo isi pi fou ua fananau mai.  

Ma sa tele mea fou na aoaoina e Me mai ia Lauama.  Na iai se uo a Me e igoa ia Uili, ma o lenei pi, o se manu lotoalofa ma le agalelei, ae e le atamai tele.

Na faapea atu Lauama i pi fou o le faamoega, o la latou ituaiga, o ni manu galulue malosi.  O aso uma e felelei atu ai ma ao mai ia le ‘honey’, e tatau la ona iloa po o fea fugalaau o lo’o iai le ‘honey’.  Ma o le a ia a’oa’oina le vaega laiti lea mea uma i le latou galuega.  E pei o manu e tatau ona nofouta iai ina ne’i lamatia ai o latou ola.

O le aso na soso’o ai na ala mai ai i luga ia Me, o lo’o vevesi solo pi o le fa’amoega.  Ua toatele pi i totonu o le fa’amoega ma ua avea ma tulaga ua vevela ai le faamoega ma ua liu suavaia ai le ‘honey’.  Ma sa va’aia e Me le pisi uma o pi sa iai i totonu o le faamoega, e ta ta o latou apa’au, e taumafai e toe fa’amalo le ‘honey’.

Ma na oso atu Me ma ta ta atu foi ona ia apa’au e fesoasoani i le fa’amaloina o le ‘honey’, ae iloa ai e Me, o le malosi o le ta o ona apa’au, o le maualuga foi lena o le alua’e o lona tino i luga o le ea.

Ua matua’i fiafia tele Me ma ia fa’ailoa atu i pi o le faamoega, o ia lea la’a a’o lana lele mai ia Lauama. 

Ua mae’a ona a’o le lele a Me, ma ua ova i le lagi le fiafia o Me e fealua’i e ao mai le ‘honey’ ae le gata i lea, sa maua ai foi ma seisi ana uo fou, le alii o Filipi.   O Filipi, o le Se, ma e pei ona sa ia fai ia Me, o Se e fiafia e puna puna solo.  Ma sa ia folafola ia Me, o le a ia fesoasoani ia Me pe afai e manaomia le fesoasoani.

Ma sa fai mai Filipi, o le a iai lava le taimi e mana’omia ai e Me se fesoasoani ona o le ulu malo.

 A’o felelelelea’i solo ia Me, sa ia manatu ifo, o le a le toe fo’i i totonu o le faamoega, ona e sili atu le manaia o le felelelelea’i solo i fafo, nai lo le nofonofo i totonu o le fa’amoega.

Ua va’ai atu Me, o tu mai se fugalaau matagofie lava, ona ia faapea ifo lea, “o lea o le a ou moe i’i.”

E le’i umi lava ona taoto ifo Me i luga o le fugalau, ae ta’agulu loa.

[IA MANUIA FUAFUAGA O LENEI VAIASO]