Ads by Google Ads by Google

Fesiligia Senatoa faaiuga kovana fa’atatau totogi malo

Na fesiligia e ni isi o afioga i Senatoa i le vaiaso nei, le fa’aiuga a le alii Kovana e aveese mai le faagaioiina o totogi a le malo (payroll) mai le Ofisa o le Tupe, ae tuu atu i le Matagaluega o Tagata Faigaluega (DHR) a le malo.

 

O lea mataupu na fesiligia i se iloiloga sa faia e le maota maualuga i le vaiaso nei, lea na molimau ai le Teutupe a le malo e tusa ai o tofiga a le kovana fa’asaga ia te i laua ma le ali’i loia o Steve Watson, e avea ai ma totino o le Komiti o le Atina’e a le malo.

 

O le mataup e faatatau i le tuuina atu o totogi a le malo i le DHR, na laga ina ua fesili le sui peresetene ia Nuanuaolefeagaiga S. Nua i le Teutupe, pe ua i ai sana fuafuaga e toe amata tulaga o ‘payroll deduction’ mo tagata faigaluega a le malo, lea e aofia ai ma tagata faigaluega i Manu’a, ona o le faigata o tulaga o femalagaaiga mo tagata Manu’a e malaga mai ai e totogi a latou pili ma toe fo’i i Manu’a.

 

Na saunoa Ueligitone Tonumaipe’a e fa’apea, o le ‘payroll deduction’ ua fa’amoemoe e toe amata i le aso 1 Oketopa 2014, o le aso fo’i lea e amata ai le tausaga tupe fou, pau le suiga, o le a le toe i lalo o lona Ofisa le vaavaaiga o le ‘payroll deduction’, ae o le a taoto atu i lalo o le vaaiga a le Fa’atonusili o le DHR.

 

E le i nofo lelei i le finagalo o Nuanuaolefeagaiga le mataupu e pei ona saunoa i ai le Teutupe, ona o le Ofisa lava o le Tupe e tatau ona gafa ma le totogiina o tagata faigaluega a le malo.

 

“Ae o le a se fautuaga a le Tulafono e fa’atatau i le ‘payroll’ a le malo, o ai e tatau ona faia totogi o tagata faigaluega a le malo?”, o le fesili lea a Nuanuaolefeagaiga ia Tonumaipe’a, ae na tali le Teutupe, “Ou te le malamalama la i le tulaga lena, pau le fautuaga a le alii kovana, e ave le ‘payroll’ i le DHR”, o le tali lea a Tonumaipe’a.

 

Na taua e le afioga i le alii senatoa ia Gaea Perefoti Failautusi, lea fo’i sa avea muamua ma Teutupe a le malo e fa’apea, e le talafeagai le saini o le tuetupe i luga o siaki o le ‘payroll’ ae pulea e le DHR le ‘payroll’.

 

“E faapefea la pe afai ae tula’i mai ni pefea i siaki a le malo poo nisi mafuaaga, ae o lea ua taoto atu le  ‘payroll’ i lalo o le DHR ao oe lea e te saini ai, o le a sau tali, o le mafua’aga lena ou te tete’e ai i le tulaga lea”, o le saunoaga lea a Gaea, ae lei tali ai le Teutupe.

 

I luma o le maota o sui, sa fesiligia ai fo’i e ni isi o faipule le mataupu e fa’atatau i le ‘payroll’ a le malo lea ua faatonu e le alii kovana e tuu atu i le Ofisa a le DHR, ona e talitonu i latou, o le tiute lava ia a le Ofisa o le Tupe o le fai o totogi a tagata faigaluega a le malo.