Ads by Google Ads by Google

Aloaia fitafita i so'o se vaega'au ua maliliu

LOLO: O LA OUTOU TAUTUA UA MAFAI AI ONA 'AE 'AE ATUNUU MA AIGA MANUIA

 

O teu fugalaau, o pesega atoa ai ma le tula’i fa’aaloalo, o ni isi ia o gaioiga na mafai ona tu’u faatasia e le malo o Amerika Samoa i le taeao ananafi, e faailoa ai lo latou tutu faatasi e faamanatu soifua o tama, tina, uso, tuafafine ma fanau sa ofoina atu o latou soifua e tautua ai le malo tele o Amerika, atoa ai ma le teritori o Amerika Samoa, a’o faamanatuina e Setete ma Teritori uma o le malo tele le aso Tuugamau ananafi.

 

O se sauniga puupuu sa faia i luga o le sami e manatua ai soifua o i latou na maliliu i le sami, na tatalaina ai sauniga a le malo i le taeao ananafi mo le Aso Tuugamau, ae faai’u i le sauniga sa faia i le nofoaga o Fitafita Tuai i Tafuna.

 

O le afioga i le Kovana Sili ia Lolo Matalasi Moliga na saunoa i le sauniga sa faia i luga o le sami, ae o le afioga i le Lutena Kovana ia Lemanu Peleti Mauga na saunoa i le sauniga sa faia i le nofoaga o Fitafita Tuai i Tafuna.

 

E te’a laititi le 8:00 i le taeao ananafi ae malaga ese atu loa le va’a o le MV Sili mai le uafu i Fagatogo, mo le momolia o sui o le malo aua le sauniga sa faia i le sami i luga tonu o le gutu o le ‘ava, e faamanatu ai soifua o i latou uma sa maliliu i luga o le sami.

 

Sa auai i lea sauniga le afioga i le Faamasino Sili ia Michael Kruse, o afioga i Faipule e to’alua, o i laua fo’i o ni isi o fitafita tuai sa tautua i vaega au a le malo ia Faimealelei Anthony Fu’e Allen ma Atualevao Gafatasi Afalava, atoa ai ma ni isi o sui o le Kapeneta a le alii kovana.

 

O le susuga Rev. Sanerivi Mulitalo ma le Ekalesia EFKAS i Aolofau na taitaia le sauniga, lea na ia saunoa ai e faamamafa le taua o le ofoina atu o le ola e tautua ai le malo, atunuu atoa ai aiga ma ekalesia.

 

O le tofa Fiu Saelua sa fai ma fofoga o le aso.  I le saunoaga autu mai le kovana sili, sa ia faafetaia ai le tautua sa mafai ona ofoina atu e i latou ua fai i lagi le folauga, lea ua mafua ai ona ‘ae ‘ae aiga ma le atunuu i manuia eseese.

 

“O lenei aso, e le gata tatou te faamanatuina ai soifua o i latou sa tautua i le malo tele, ae o se aso fo’i tatou te manatua ai soifua o e pele i o tatou loto, sa tautua i totonu o le malo o Amerika, faapea ai aiga, nuu ma ekalesia, ma o teu fugalaau o le a lafoina i le sami, o le a faamanatu ai la latou tautua sa ofoina atu mo i tatou uma,” o le saunoaga lea a le alii kovana.

 

Na taua foi e Lolo e faapea, e le gata o le aso lenei e manatua ai le tautua ai i latou uma nei, ae o se aso fo’i e tatou te faafetaia ai mea lelei uma sa latou faia mo i tatou, a’o tautua ai i totonu o le malo, atunuu ma aiga.

 

O le kovana sili ma le faamasino sili la tuu faatasi e lafo le teu fugalaau aga’i i le sami e manatua ai soifua na maliliu i le sami, a’o faatinoina e le Matagaluega o Leoleo le tula’i fa’aaloalo e ala i le faapapaina o fana, atoa ai ma le iliina o le pu na faatinoina lea e le tama’ita’i leoleo ia Off. Tekauita Lemisio.

 

A’o faataunuuina le sauniga i gataifale, ae o le taimi foi lea sa faataunuuina ai se sauniga lotu i luma o le maa faamanatu a Fitafita Tuai lea na avea ai le tofa Le’i Sonny Thompson ma fofoga o le aso.

 

O lea sauniga na auai ai le susuga i le Lutena Kovana ma i. se vaega o lana saunoaga, sa ia taua ai le tatau lea ona tuu faatasi le malo ma le atunuu atoa e faamanatu soifua o i latou sa tautua i vaega au eseese a le malo tele ua maliliu, atoa ai e pele i loto ma agaga ua fai i lagi le latou folauga.