O le aoauli ananafi sa fa’atasia ai sui uma o le Women’s Hospital Auxillary (WHA) i le Falema’i o le LBJ ma ali’i foma’i e to’alua, Dr. Tuato’o Reese ma Dr James Marone mai le Potu o Talavai a le Fanauiti, ina ia taua’ao aloa’ia le foa’i tupe a le WHA e fa’aleleia ai le masini fa’ata o le fatu ua leaga. O le latou Sui Peresetene Suni Felise sa ia taua’aoina aloaia le siaki e $2,525.00.

I le saunoaga a Dr Reese e fa’afetaia ai le foa’i, sa ia fa’ailoa ai, “O lenei foa’i, ma e le o se taimi muamua lea ua tali mai ai lenei ‘Sosaiete a Tina alolofa o le Women’s Hospital Auxillary’, e fesoasoani mai i le fa’atinoga o le matou auaunaga i taimi o le mana’omia fa’apenei.”

Sa ia fa’ailoa mai, “O lenei taimi, o se vaega tupe ua mo’omia e i matou e totogia ai le toe faaleleia o le masini fa’apitoa mo le fa’alogoina o le tata o le fatu, ma e aoga tele i le sailiga po’o tau afaina le fatu o se tasi pe leai. Ina ua talosaga atu i le WHA, lea ua tatou faia ai lenei fa’atasiga e fa’ailo le latou tali alofa mai!”

O le ali’i foma’i o Dr Marone, sa ia tali mai i le fa’aperetania, ma ia fa’ailoa fo’i, “O le tali mai a nei tina agalelei, e iloga ai, e alolofa tele tina o le atunu’u i a latou fanau. Ua agaga moni i latou ina ia tautuaina o tatou tagata o lo’o mo’omia le togafitiga fa’apitoa o le fatu.”

Na fa’afetaia e i la’ua nei le foa’i ina ia fa’aleleia ai le masini fa’apitoa mo le fatu, ma sa latou fa’ailoa mai fo’i, “Ua toe mautinoa nei, e fa’aauau ona faia talavai mo le fatu pe a o’o ina mae’a lipea ma totogia lea pili mo le masini lea.”

I le Women’s Auxillary sa auai atu ai le Sui Peresetene Suni Felise, le Failautusi Eseta Sataua ma sui iloga ua loa le latou tautua i le WHA: Helga Lefiti, Pauline Young, Nalei Moors, ma Tabai Trevola. O le latou peresetene o Betty Ah Soon o lo’o malaga i fafo.

TOE FAATAGA 30 ASO MO LE POLNESIA MO MANU’A

fa’aauau fo’i ona toe talia mai e le Matagaluega o Feoaiga a le fetarale le isi soso’oga o femalaga’iga a le va’alele a le Polenisia a Samoa i le va o Tutuila ma le Manu’atele.

O lea pemita e 30 aso, e amata mai ia Iulai 28 se’ia o’o fo’i ia Aokuso 27, 2015. O le fa’atagaga lenei e mafai ai ona fela’ua’i uta, meli ma tagata i le va o Manu’atele ma Tutuila ma ua tali leleia mai ai fo’i le talsoaga aloaia sa taua’aoina atu e le Polynesian Airlines ia Iulai 14, 2015.

Ua fa’aauau ona tu’uina mai lenei avanoa mo femalaga’iga a le Polenisia ona ua matauina ma ua fa’amaonia lava, e leai se isi va’alele a Amerika e mafaia ona fealua’i i lea va, ae mo’omia tele lea fo’i tautua i le va o tatou nei motu.

Ua i ai fo’i malaga fa’atulaga mo le Malae va’alele i Ofu fa’apea ma le malae va’alele i Fitiuta e pei ona masani ai. Peita’i, ua i ai le kamupani va’alele a le Tausani, lea e latou te lisia le va’alele a le malo, Segaula, i le taimi nei, o lo’o tatalia fo’i le latou talosaga ina ia talia mai a latou feoa’iga i le ea i le va fo’i o Manu’a ma Tutuila nei.