Viia to’atele atunu’u faigamalo i le tele suiga polokalame fu’a

O suiga ua maitauina e ni isi o le atunuu i sauniga ma polokalame o le fu’a o lenei tausaga, ua latou viia ai le faigamalo ona o le manatu e faa faigofie polokalame mo le atunuu ina ia mafai ai ona latou maua le avanoa e auai ma molimauina sauniga o le fu’a.

 

“O le lua ai lenei o tausaga talu ona ou maitauina ni isi o suiga i polokalame o le fu’a a le atunuu, e le gata ua vave amata polokalame mo sauniga o le sisiina o le fu’a, ae ua faaaoga fo’i le malae i Utulei e faataunuu ai faafiafiaga, toe maua ma le pepa taumafa e $7 mo le atunuu,” o le saunoaga lea a le tama matua ia Filiga Amituana’i, o se tasi o tama matua na auai i sauniga o le fu’a i le aso Tofi na te’a nei.

 

O le toatele o le atunuu na fesiligia i tulaga o pepa taumafa sa mafai ona tufatufa atu i le aso Tofi na te’a nei, sa latou faafetaia ai le alii kovana ia Lolo Matalasi Moliga ma le faigamalo, ona o le manatu e ave le faamuamua i le atunuu lautele, ina ia mafai ai ona latou maua le avanoa e auai i sauniga o le fu’a.

 

“O isi tagata e fia o mai e matamata i sauniga o le fu’a ae faigata ona e leai se tupe e faatau ai se meaai i totonu o le paka, ae o pepa meaai ta’i $7 lea ua tufatufa i tagata, o se faamama avega sili lea mo aiga lima vaivai e i ai lo’u aiga,” o le saunoaga lea a le tama ia Reupena Ifopo o Iliili, lea na malaga atu ma nai ona alo e to’atolu e matamata i sauniga o le fu’a.

 

Na tofu uma Peniamina ma nai ona alo e to’atolu ma pepa taumafai ta’i $7, ma o se faamama avega lea mo ia ma si ana fanau i le aso ananafi.

 

“O le tausaga na te’a nei na matou o mai ai fo’i ma la’u fanau e matamata i polokalame o le fu’a ae tofu ai matou ma pepa meaai ta’i $5, a o lenei ua sii i le ta’i $7, le iloa pe te i ua oo atu i le fu’a o le tausaga fou ua o o atu i le $10,” o le saunoaga lea a Peniamina ma soi soi.

 

E le i umi lava ona lolofi atu le mamalu o le atunuu ma latou pepa meaai e faatau i faleaiga sa i totonu o le paka ae gaogao le tele o fale’aiga, ae o isi fale’aiga sa toe fa’atali le taimi e taunuu atu ai isi a latou kuka vela.

 

Pau le itu na tau faalogoina ai e le aufai galuega sa gafa ma le tufatufaina o pepa taumafai, ina ua taunu’u atu isi o le atunuu i totonu o le malae ua mae’a pepa taumafa sa tufatufa, ui o lea, sa le i avea lea faaletonu ma itu na taofia ai le agaga fiafia o le to’atele ina ua latou molimauina le matagofie o faafiafiaga eseese mai afioaga ma pisinisi ma tofu sao i le fu’a o lenei tausaga.

 

O le solo o savali i le mae’a ai ona sisi o le fu’a, o le isi lea tulaga sa faaalia e ni isi o le atunuu le faafiafiaina ai o i latou, ona o le felanulanua’i o le auala sa faatinoina ai, e le gata o savali a pisinisi ma kamupani tua, o i latou fo’i ia sa fa’apitoa i ai le fu’a o lenei tausaga, ae faapea fo’i i au taaalo ma isi matagaluega a le malo sa mafai ona faalauiloa la latou sao, e pei o l Pulega o le Eletise ma le Suavaii, aemaise ai pisinisi tua e pei o le kamupani a le Tools Shop, ACE Haradare ma le CBT.

 

O tulaga sa pito sili ona mataina i le silasila a le toatele o le atunuu, o taavale teuteuina mai le Pulega a le Eletise ma le Suavai, lea na mafai ona faalauiloa ai isi vaega o le latou tautua i le atunuu, e pei o le vaega o le eletise, suavai lafoa’i suavai taumafa ma le otaota lapisi.

 

Na tau fai pati pati le au valaaulia faapea ai le mamalu o le atunuu sa molimauina solo o taavale teuteuina a le ASPA, ona o le mataina o auala sa faatinoina ai a latou galuega faatino i luga o a latou taavale teuteuina, e pei o le faaolaina o le eletise i luga o pou uila sa i luga o le isi vaa, o le tautua a le vaega o le suavai taumafa e pei ona molimauina i luga o le isi taavale teuteuina, faapea ai le vaega o le lapisi lafoa’i.

 

I taavale teuteuina a kamupani e pei o le ACE Hardware, CBT  ma le Tools Shop sa molimauina e le atunuu, sa latou aumaia ai ituaiga galuega o lo o latou fa’atinoina la latou tautua i le atunuu, e pei o oloa fau fale, aemaise ai o le faalauiloaina o ni tama’i fale e mafai ona latou fausia.

 

FA’AFIAFIAGA I PESE MA SIVA

 

E le i mafai e upu ona faamatala le tulaga mataina sa i ai faafiafiaga i siva ma pese faaleaganuu sa molimauina e le atunuu i le fu’a o lenei tausaga, e le gata i le mafagofie o fati sa fati ai pese faaleaganuu, ae o faaupuga fo’i e malie i le faafofoga.

 

I le pese faaleaganuu a le afioaga o Saanapu mai Samoa, e tele ni isi o mataupu sa aofia i le latou pese, e ese mai i viiviiga o laufanua o Amerika Samoa, atoa ai ma le faafetai i le faigamalo ona o atina’e ma galuega lelei ua mae’a ona fa’atinoina o le atunuu, e pei o le talosaga ia Lolo Matalasi Moliga ma Lemanu Peleti Mauga, ina ia aua nei toe faafoiina atu tagata mai Samoa ua overstayer i le teritori, ae sili pe a faatafea i se vaa faila i Amerika, e saili ai ni a latou lumana’i.

 

Na talosagaina fo’i e le afioaga o Saanapu ia Lolo ma Lemanu, ina ia talosaga ia Obama ma le malo o Amerika Samoa, o se vaega tupe e fausia ai se auala laupapa e ui atu i Leone ae taunuu atu i Aleipata, ina ia faa faigofie ai feuiaiga i le va o Samoa i le taimi nei.

 

I le pese a le afioaga o Pago Pago, sa latou faafetaia ai Lolo ma Lemanu ona o le polokalame ua mafai ona toe faafou ai pepa nofomau o le toatele o tagata ua leva ona nonofo solitulafono i totonu o le atunuu.

 

I le faafiafiaga a le kamupani o le StarKist Samoa, sa latou faafetaia ai le alii kovana ona o le avanoa ua mafai ai ona valaaulia i latou e fai so latou sao mo le fu’a a le atunuu i lenei tausaga.

 

Na faaiu le pese faaleaganuu a le kamupani o le StarKist Samoa i lo latou talosagaina lea o le alii palemia ia Tuilaepa Sailele Malielegaoi, mo se avanoa e valaaulia ai i latou e faafiafia i le fu’a a Samoa i le tausaga nei.

Comment Here