Na fesiligia e le afioga i le ali’i faipule ia Galu Satele Jr le Fofoga Fetalai o le Maota o Sui, pe ua i ai se fuafuaga a le Fono e foia ai le faafitauli ua tula’i mai i le kamupani i’a o le StarKist, i le fa’amalolo lea o ana tagata faigaluega. Ona o lea tulaga, na faaalia ai e le afioga ia Satele Jr i luma o le maota o sui i le taeao ananafi...

lona popolega ua i ai ona o lea ua amata ona faamalolo tagata faigaluega a le kamupani e pei ona latou fuafuaina ai i totonu o le 6 masina.

Na taua e le afioga Satele i le taimi o folafolaga a le maota o sui, e tusa ai ma ni ripoti ua ia maua, e oo atu i le masina fou ua atoa le to’a 300 o tagata ua mae’a onaa faamalolo mai a latou galuega, ma le isi to’a 200 o loo fuafua e faamalolo ia Oketopa.

Ona o ia ripoti, sa ia fesiligia ai le Fofoga Fetalai o le Maota o Sui, le tofa ia Savali Talavou Ale, pe ua i ai se fuafuaga a le Fono i le sailia lea o se auala e foia ai lenei faafitauli, e pei ona talosagaina e le kamupani i se fonotaga ma sui o le Fono i le ogatotonu o lenei tausaga.

Saunoa Satele Jr, i le fonotaga a sui o le kamupani i’a ma le Fono ini nai masina e le’i mamao atu, na talosagaina ai e le kamupani se avanoa e tofia ai se Komiti Fa’apitoa a le Fono (Task Force) latou te vaavaaia ni auala e mafai ai ona foia le faafitauli e pei ona tula’i mai.

“E taua tele le Komiti lea aua o le a mafai ona latou fautuaina le malo ma saili auala e foia ai le faaauauina lea o le faamalolo o tagata mai a latou galuega,” o se vaega lea o le saunoaga a le afioga i le ali’i faipule ia Satele Jr ina ua fesiligia e le Samoa News i le taeao ananafi.

Sa ia taua fo’i, o se popolega i lona sui faipule, ona o lea o le a alo atu le Fono i lana malologa e 4 vaiaso, ae o loo faaauau pea ona faamalolo tagata faigaluega, ae o le to’atele o tagata faigaluega o loo aafia o tagata mai lona itumalo.

“O lea o le a toe a’e mai aoga a le fanau, ae o lea o le a faamalolo tagata faigaluega ma leai ni galuega e totogi ai pili o a latou fanau, ou te iloa fo’i o le a to’atele aiga o le a sili ona mafatia lo latou tamaoaiga ona o le a leai ni galuega,” o le saunoaga lea a le afioga ia Satele Jr.

Sa ia taua i lana saunoaga, o le avanoa lelei lenei e tatau ai i le malo ma le Fono ona saili se fofo o lenei faafitauli, ina nei tuu atu i se isi taimi, ae te’i ua tula’i mai ai se isi faaiuga matuia e pei o le tula’i ese o le kamupani.

Na taua e Satele, o nisi o ripoti ua ia maua o loo taua ai le i ai lea o ni fesootaiga o loo faia i le va o le kamupani ma le malo o Samoa, ma o se tulaga e popole ai fo’i lona sui faipule, aua e i ai lona talitonuga afai ae tupu lea tulaga, e ono faapea mai Samoa e mafai ona latou tuuina mai le tau maualalo i le totogi o tagata faigaluega, ae avatu le kamupani latou te faafoeina mai.

“O le isi fo’i itu e ono fesoasoani ai i lea tulaga, e le tau toe aoaoina tagata Samoa i le galuega, aua o le to’atele o i latou sa galulue i le kamupani o le Samoa Packing ua tapunia o tagata mai Samoa, ma e le tau toe alu se taimi o le kamupani e a’oa’o ai i latou nei,” o le saunoaga lea a Satele Jr.

Saunoa Satele Jr, e tusa ai ma faamatalaga ua maua e le Fono, sa faia ni fonotaga a le kovana ma nisi o kamupani i fafo i le tau talanoaina o le mataupu i kamupani i’a, ae o lea lava e fiu le StarKist e tau saili se avanoa latou te talanoa ai e le mafai.

Sa ia taua, e taua tele le saili o se fofo i lenei faafitauli ina ia taofia ai le toe faamalolo o isi galuega, ma toe faaopoopo ai le isi mafatiaga i le atunuu.

Na taua e le tofa Savali i lana saunoaga, e le’i maua e i laua ma le peresetene o le Senate se talosaga e pei ona fesiligia e le ali’i faipule, ae i ai lona talitonuga o se mataupu taua lenei mataupu ma e tatau fo’i ona fai.