Ua siamupini nei le Manu'ula mai le afioaga o Vatia i le la ta'aloga ma le 'au a le I'a Vai mai le afioaga o Malaeloa i le aso ananafi, i se ta'aloga mataina ma le tumu.

Sa muamua ona pate le Manu'ula ina ua sa'o le mate a le  latou ali'i kapeteni o Tevaga Akeli.  Ma na amata lava i le pe a le ali'i o Peferi i le laina ta lea na te'a atu e Pili ae poloka mai e Peferi, ma sapo e le mulumu o Simone a le I'a Vai, ma tatala ai loa ma le ta'aloga.

Soso'o ai ma le pe se'e lea na ta e Mauga o le Manu'ula ae pau i le isi mulumu o le I'a Vai, ia ona alu ai lea o 'ai i le ta a le tamaloa o Mauga.

E o'o lelei 'ai a le Manu'ula i le 25 e le toe maua lava se latou pe, soso'o atu i ai lea ma Isaako na maua ‘ai e tolu ae pe loa i le olo, soso'o atu lea ma Kiave lea na maua 'ai e sefulu ma le tasi ae pe.

Ia a'o le taimi lena ua lima polo sapo pau'u a le talitua-a a le I'a Vai, ua tele ai lava 'ai a le Manu'ula ua maua, na fa'apena fo'i le ta a le tama lea o Pisia, lea na maua ana 'ai e iva.

Ua ta-ta Mauga ae o le taimi fo'i lena ua ita mai le fa'ate'a o le I'a Vai o Pili, lea na toe togi atu lava lana silou polo (slow ball) na tau lelei lava i le 'olo, ma pe ai loa Mauga, e pe mai Mauga ae ua atoa lelei le 48 'ai, ae fa'ato'a lima pe.

Ia ona alu lava lea o le ta'aloga, i le iva o pe ae ua maua lelei le latou lima sefulu ono (56) o 'ai, toe fa'aoso atu lea latou afa mulimuli lea la na vaaia ai loa ia John, ma le tama o Tony, ia na pe-pe mai ae ua maua le la ta'i sefulu 'ai, tusa e lua sefulu 'ai na mai i le to'alua.

I le tu atu la i luga o Peti lea na maua ana 'ai e sefulu tasi, a'o le taimi lena ua ova le tele o polo sapo a le I'a Vai, na pa'u i le fa'atamala o le latou talitua-a, fa'atoa toe oso isi 'ai a le Manu'ula ina tu-tu atu i luga ia Koi ma Mareko, lea na mauaina isi 'ai e sefulu fitu (17), o Mareko e sefulu ona 'ai ae o Koi e fitu.

E uma a'e le 'au a le Manu'ula ua maua lelei lava le selau lua sefulu (120) a latou 'ai, i le tele o polo sapo ia na pa'u i le fa'atamala o le latou talitua-a, (11) e sefulu ma le tasi ia polo pa'u.

Ae valu lelei 'olo na maua e le I'a Vai, e ono (6) olo a Pili ae lua (2) Tali.

Ia ona o ane lea o le I'a Vai mo le tuliina o 'ai e selau lua sefulu (120) a le Manu'ula.  Na tamua ia le Susuga i le Fa'afeagaiga o Faigata ma lana soa o Ailao, e lima 'ai a le faifeau ae ono 'ai o le isi latou tamua, ina soso'o atu lea o Tipeni (2) ma Siaosi lea na'o le tasi le 'ai, soso'o mai lea ma Ah Kee lea na maua ana 'ai e iva, soso'o mai lea ma Pili, lea na tau taofi mai ai pe, ina ua naunau tele fua le tama lea o Pili ua alai ona pe, e pe ifo ua maua lelei lava le tolu sefulu tolu (33) ina ua ta tu sa'o lava i luga lea na sapo mai Tevaga.

Na sapoia mai fo'i i tua i le ova lua le ta a Tutuila, lea na maua ana 'ai e ono, ia soso'o mai lava lea o le ta'ilua, lea na toe oso a latou 'ai i le ta a Mika lea na maua 'ai e ono, ma Seigafo lea na paga e ono fo'i ona 'ai, ma Iosua lea na maua 'ai e lima.

Ia a'o le isi to'afa lea na mulimuli mai na o le fa foi a latou 'ai ma i'u ai loa le ta'aloga ina ua maua pe e sefulu ma le iva, ae le taitai ona maua 'ai a le Manu'ula.

E valu lelei 'olo na maua e fa'ate'a a le Manu'ula, 3 'olo a Manufili, 3 Kiave, ma le lua na maua mai ia Fa'atali. Manuia le Fu'a o le Tausaga e 2010.