Na matua mataina taumafaiga a ‘au uma e 24 o lo o auai i le ta’amilosaga lona 3 fa’avaomalo a le TMO Marist A.S 7’s o lo o fa’agasolo i le malae o le VA Stadium i Tafuna i le taimi nei, ina ua molimauina e le mamalu o le atunuu tulaga maualuga ua i ai le ta’aloga lakapi i Samoa i le taimi nei.

Talu ona fa’atautaia mai e le kalapu a Malisi Sagato Iosefo i Amerika Samoa nei le ta’amilosaga fa’avaomalo ta’ito’a 7 lenei mo le lona tolu ai lenei o tausaga, o se tausaga ese lenei ua molimauina ai le maualuga o le auala ua i ai le fa’atinoina e kalapu lakapi a Amerika Samoa o le ta’aloga lakapi.

“O se tausaga ese lenei talu ona ou auai mai i le ta’amilosaga ta’ito’a 7 lenei a Malisi ua ou molimauina ai le siitia o le tulaga ua i ai le fa’atinoina e kalapu a Amerika Samoa o le ta’aloga lakapi, e le gata ua siitia le tulaga o le malosi o tama ta’aalo, ae ua televave fo’i le fa’atinoina o le ta’aloga,” o le saunoaga lea a le alo o Samoa ua avea nei ma laufali fa’avaomalo a le IRB, susuga Tui Komiti.

Mai ‘au e 24 o lo o tausinio i le ta’amilosaga i le fa’aiuga o lenei vaiaso, e 8 kalapu mai Amerika Samoa nei, 15 ‘au mai Samoa, ma le ‘au e tasi mai le malo o Tonga, lea na faiaina i lana ulua’i ta’aloga ma le ‘au a Siutu, Salailua i ‘ai e 14-0.

E ui e leai se ‘au mai Amerika Samoa nei na manumalo i ana ta’aloga ta’ilua i le aso muamua ananafi, peita’i o se tasi o itu sa mataina i le maimoa a le atunuu, o le auala sa fa’atinoina ai ‘au ta’itasi le ta’aloga, aemaise ai le taimi e fetaia’i ai ma ni isi ua iloga i le taaloga lakapi mai Samoa e pei o Lolo Lui, Fa’alemiga Selesele ma Patrick Fa’apale.

O isi igoa fou i le taaloga lakapi mai Samoa sa mafai ona molimauina i le ulua’i aso o le ta’amilosaga e aofia ai Vavao Afemai, Oneone Fa’afou, Misioka Timoteo, ma le uigi saoasaoa o Foma’i Ah Ki.

Ae le i tuu mamaina fo’i i ni isi o alo o le atunuu sa filifilia i lana au ta’ito’a 7, le Talavalu e pei o le susuga ia Ryan Paaga lea fo’i na ia mauaina le ulua’i sikoa mo Nuuuli i le ulua’i ta’alosaga na tatala ai le ta’amilosaga ananafi, ma faiaina ai i le au malosi mai Fa’atoia i ‘ai e 19-5.

O le fa’aiuga o le taamilosaga o lo o faagasolo nei o le a sola ai le ‘au e siamupini ma le fa’ailoga tupe e $10,000, faapea ai ma le Ipu o le siamupini, lea na umia mai e le au malosi a le BBE Vaiala mo le lua tausaga.