Na taua e le ali’i pagota o Vilitoni Tuia i luma o le Fa’amasinoga Fa’aitumalo i le vaiaso na te’a nei e fa’apea, o lona ita tele i le alii pagota na a’afia i le pisa ae o lo o vevela totonu o le sela o lo o loka ai laua, na mafua ai ona ia fa’asaga atu ma fasi loa.

O Tuia na taofia e leoleo i le amataga o le tausaga nei, ona o tu’uaiga i lona gaoia lea o se telefoni mai totonu o le faleoloa o le BlueSky i le masina o Tesema 2013, ma taofia ai loa o ia i le toese i Tafuna.

I le masina na te’a nei a o taofia ai o ia i le toese i Tafuna, na toe molia ai o ia e le malo i moliaga mama e lua o le faaoolima i le tulaga tolu ma le faatupu vevesi i nofoaga faitele, ina ua ia faaoolima i se alii pagota sa loka faatasi laua i le sela e tasi.

Ae i lalo o se maliliega sa latou faia ma le malo ma talia e le faamasinoga faaitumalo, na tali ioe ai Tuia i le moliaga o le faaoolima i le tulaga tolu, ae solofua e le faamasinoga le isi moliaga o le faatupu vevesi i nofoaga faitele.

Ina ua fesiligia e le alii faamasino ia John Ward II le ua molia i le mafuaga o le solitulafono, sa ia taua ai e faapea, na ita i le pisa tele o le alii pagota ae o lo o vevela totonu o le sela, o lea na ia faaoolima ai ia te ia.

Na faatoese le ua molia i luma o le faamasinoga e tusa ai o lana solitulafono sa fai, ma ia talosagaina ai le fa’amasinoga mo se isi avanoa mo ia.

I le mae’a ai ona iloilo e le fa’amasinoga o tulaga uma e faatatau i le mea sa tupu, na faasala ai loa e le fa’amasinoga Tuia e taofia i le toese i Tafuna mo le 90 aso.

O lo o i ai pea Tuia i le toese i Tafuna i le taimi nei mo le tuliina o lana fa’asalaga fou, ae o lo o fa’atali fo’i o ia mo le faaiuga o le mataupu e pei ona tuuaia ai o ia i lona ave faagaoi o se telefoni mai le BlueSky.