Ads by Google Ads by Google

Vevela felafolafoaiga Senatoa i suiga i le Paketi Faaopoopo a le Kovana

O suiga a le Senate lea ua pasia mo le Paketi Faaopoopo (supplemental) na faaulu e le kovana sili i le vaiaso na te’a nei, e faasoasoa ai le $5miliona e faatupe ai ni isi o manaoga a le malo, na mafua ai ona tau vevela felafolafoaiga i le va o le Peresetene o le Senate ma le alii senatoa ia Laolagi Fonoti Savali Vaeao, o le taitai komiti lea o le Paketi a le maota i le mafuaaga o suiga.

 

O suiga a le senate na pasia i le faitauga faalua o le pili i le aso Tofi na te’a nei, e aofia ai le aveese mai o le $100,000 mai le $300,000 sa fuafua mo le faaleleia o Faleaoga a le Ofisa o Aoga, ae ave e faaleleia ai le vaa o le MV Sili lea ua tu e le o toe felua’i, ona o se faaletonu i le tapili o le vaa na leaga i sana malaga i Manu’a i le amataga o le masina na te’a nei.

 

A’o le’i faalauiloa e Laolagi suiga i luma o le maota, na fesili le alii peresetene i lona fia malamalama pe aisea ua tipi mai ai le tupe sa fuafua e faaleleia ai Faleaoga, ae ave e faatupe ai se manaoga e le o aofia i totonu o le paketi faaopoopo a le alii kovana.

 

Na faailoa e Gaoteote i luma o le maota e faapea, toeititi leai se senatoa e le’i saunoa i tulaga faaletonu o lo o i ai faleaoga i le atunuu, atoa ai ma le manaomia o se tupe e faaleleia ai faleaoga, a’o lea ua fai le latou faaiuga e tipi ese mai le tupe sa fuafua e faaleleia ai faleaoga e faalelei ai le MV Sili.

 

“Afai o lo o manaomia se tupe e faaleleia ai le MV Sili, e sili ona aami i latou o lo o gafa ma le galuega e fesili i ai, poo latou manaomia se tupe pe leai fo’i,” o le saunoaga lea a Gaoteote ma lona si’ufofoga ua amata ona siisii i luga, ae na toe faamanino e Laolagi e faapea, e tele isi vaega o lo o i totonu o le paketi faaopoopo a le kovana na manatu le maota e tipi mai ai se tupe mo le MV Sili, peitai o lea ua tasi le faaiuga a le komiti e aveese mai le tupe mai le tupe a le Ofisa o Aoga.

 

“E talitonu le komiti ua lava ma totoe le $200,000 lea o lo o i totonu o le paketi faaopoopo a le kovana e faaleleia ai faleaoga, faaopoopo i ai ma le $1miliona sa faaavanoa mai i le paketi o le tausaga tupe lenei 2013,” o le saunoaga lea a Laolagi.

 

E le’i uma lelei le saunoaga a Laolagi ae faauivalea le alii peresetene ma ia fesili pe na talosaga mai le MV Sili i se tupe, ae na tali Lagolagi, “E le’i talosaga mai, ae ou te talitonu e manaomia se tupe mo le vaa ina ia faaleleia ai ana femalagaaiga mo Manu’a.”

 

“E faafefea la ona fai la outou faaiuga lea pe afai e le’i talosaga mai le MV Sili mo se tupe,?” o le toe faauilavea atu lea a Gaoteote ma lona si’ufofoga ua siisii i luga.

 

“O le paketi faaopoopo lea ua outou suiga, o le paketi faaopoopo na aumai e le kovana, soo se vaega lava o le malo e mananao i se tupe, e talosaga i le kovana, ona tuu mai lea e le kovana o le manaoga i luma o le fono, ae ui o lea, o le a fai pea le finagalo o le maota, pau le tiute o le laulau o le faamanatu atu,” o le saunoaga lea a Gaoteote ma pasia ai loa e le senate le pili o le $5miliona i lona faitauga faalua ma le faamoemoe o le taeao nei e faitau tolu ai.

 

Ae i le maota o sui, o le aso Tofi na tea nei na pasia ai la latou pili e faasoasoa atu ai le $5miliona e pei ona talosagaina e le alii kovana, e faatupe ai ni isi o manaoga a le malo i le palota e 16-0, e aunoa ma ni suiga.

 

Ina ua faitau faalua le pili a le maota o sui i le aso Lulu na te’a nei, na fautuaina e le alii faipule ia Larry Sanitoa le maota, pe le mafai ona aveese mai se vaega tupe mai le $500,000 lea o lo o faaagaga e toe faatumu ai le tupe sa aveese mai i le paketi a le Fono, e fesoasoani ai i ni isi o manaoga o lo o tula’i mai i le malo e pei o le lava o tupe e faaleleia ai auala, faaletonu i faleaoga.

 

Fai mai Senatoa, o le galuega mo le faaleleia o le atunuu atoa o le galuega fai faatasi lea a le faigamalo ma le fono. E leai se isi na lagolagoina le finagalo o le alii faipule.