Na taua e le afioga i le alii Senatoa ia Velega Savali Jr, o ia foi lea o le taitaifono o le komiti o le ASPA/TEO a le Senate, na pau lava le auala e foia ai feeseeseaiga o loo tulai mai pea i le va o le Fono Faitulafono ma le ASPA i le tulaga o le paketi, o le Faamasinoga.

E le o se taimi muamua lea ua taua ai e le alii Senatoa mai Manu’a le tulaga o le tuuina atu lea o lenei mataupu i le Faamasinoga, e saili ai poo fea tonu o loo taoto ai le sa’o o lenei mataupu, ma foia ai le faafitauli o loo tulai mai pea i le va o vaega ia e lua a le malo, ona o loo i ai le talitonuga a le ASPA, o i latou e pulea lava la latou paketi, peitai i le talitonuga o le Fono e faavae mai i luga o le tulafono, o le Fono o loo i ai le malosi e iloilo ma pasia ai le Paketi a le ASPA ma isi Ofisa uma o le malo.

O le saunoaga lea a Velega ina ua maea ona faamaonia e le pulesili a le ASPA i luma o le komiti tuufaatasi a le Fono i le aso Gafua na tea nei e faapea, o loo tumau pea lava lo latou talitonuga e pei ona taua i le Vaega 15 o le Tulafono, o le Komiti Faafoe a le ASPA e faia le faaiuga faaiu i le latou paketi.

E $30.8 miliona na pasia e le Fono mai le Paketi o le Tausaga Tupe 2011 a le ASPA e faaauau ai ana galuega mo masina muamua e fa o le tausaga tupe lenei, ma le faamoemoe e toe oo atu i le fono mo le toe talanoaina o le latou paketi, peitai na faailoa e le pulesili a le ASPA o Andra Samoa i luma o le komiti tuu faatasi a le Fono, o le paketi lea o loo latou faaaogaina, o le latou paketi o le tausaga tupe lenei 2012 lea sa tauaao atu i le kovana.

Na avea le saunoaga lea a Samoa ma itu na lagalaga ai loa finagalo o nisi o sui o le komiti tuufaatasi, ma faatulai ai loa e nisi o Senatoa ma Faipule le mau ina ia taofi le iloiloga, peitai na fautua isi e faaauau pea le iloiloga, ona e taua tele le paketi a le ASPA atoa ai ma lana  tautua mo le atunuu.

Na saunoa le Sui Fofoga Fetalai ia Talia Faafetai Iaulualo e faapea, tusa lava poo ai gaioiga a le Fono e taumafai atu mo le paketi a le ASPA, e tumau lava le talitonuga a le ASPA o i latou lava e i ai le malosi i le iloiloina o le latou paketi, ona o lea tulaga, sa ia fautuaina ai loa le komiti ina ia faaauau pea le iloiloga o le paketi, ae sau se taimi ona fai lea o se finagalo o le Fono i le fautuaga a Senatoa Velega, o le fautuaga foi lea a le Fofoga Fetalai ia Savali Talavou Ale sa tuuina atu i le komiti, ina ia faaauau pea suesuega ma galuega a le Fono, sau se taimi ona faataunuu lea o le fautuaga e pei ona saunoa ia i Velega.

Saunoa le Fofoga Fetalai e faapea, afai e maua ane i suesuega a le Fono ua ova atu tupe ua faaaoga e le ASPA mai le paketi sa pasia atu e le Fono, o isi la ia faamaumauga e tatau ona aofia i totonu o taumafaiga a le Fono e tau saili ai poo fea o loo taoto ai le moni o lenei mataupu.

Na fesili Senatoa Galea’i Tuufuli ia Samoa pe o le a le paketi lea ua o mai ma latou i luma o le Fono i le fono, na tali Samoa, o le latou paketi lea na  tuuina atu i le Faatonu o le Ofisa o le Paketi a le malo mo le Tausaga Tupe 2012, ae le o le paketi lea na pasia atu e le Fono i le masina o Setema 2011.

E le o se taimi muamua lenei ua saunoa ai Velega i le mataupu lenei a le  ASPA ma le Fono e tatau ona tuuina atu i le Faamasinoga, ona o le faanaunauga, na pau lea o le auala e mafai ai ona maua le mea moni.

I le tausaga na tea nei, na tuuina atu ai foi e Velega le alii kovana ma le Teutupe a le malo i luma o le faamasinoga, i le faaaogaina lea o tupe e faatupe ai le faamanatuina o le Aso Faapitoa o Samoa i Hawaii, lea e pei ona i ai le Samoa Heritage Week, ma o lea mataupu na tuuina mai ai le poloaiga a le faamasinoga e taofi ai le malo mai lo latou faaaogaina o tupe, sei vagana ua pasia atu e le Fono, e pei ona fai mai le Tulafono.