O LE I’A O LE PA’ITELE PO O LE TANIFA

Alo maia le mamalu o pa'aga masani a lo tatou polokalama, o le isi lenei fa’aopoopoga o la tatou polokalama o Vavau a Samoa mo lenei vaiaso.

I aso anamua i le afio'aga o Fusi lea e tu i le itu i Sisifo o Fausaga, sa nonofo ai tagata o le nu'u i le itu i tai o le nu'u, peita’i o le taimi nei, ua tele ina nofoia e tagata fanua i uta e latalata i le alatele o le malo, ona o le mafua'aga lenei. Fai mai le mau a le atunu'u, sa i ai se i’a tele lava e ta'ua o le Pa’itele po ’o le Tanifa e fa’apea le tala sa nofo i le va o Apolima ma Savai’i. Fai mai le tala, so ’o se va’a lava e taualo mai i le va Upolu ma Savai’i, e leai se va’a e sao ona e fa’aumatia uma e le i’a lenei, ona manatu ai loa lea o le tama o Alo, le atali’i o Lilomaiava i Palauli, o le a ia sa'ilia se 'auala e fasi mate ai i le i’a lenei, ona ua fai ma fa’asoesa i tagata faimalaga, ona tapena ai loa lea o ana tama’i naifi 'ofe fa’atasi ai ma lona paopao, ma sauni loa lana malaga.

Ua o’o i le isi taeao, ona sauni lea o Alo, ua afifi ana tama’i naifi 'ofe i le fasi siapo, ma aloalo atu loa lona paopao i le vaega tonu o le sami o lo ’o nofo ai le Pa’itele, ma e le’i umi lava ona aloalo atu le tama i gatai o Apolima, ae ona va'aia loa le i’a ua manu a’e i luga lona ulu ona toe goto lea i lalo, ma ua oso ai loa ma le fefe o le tama i lea taimi, peita’i sa i ai pea le toa o lona loto, e le’i umi ae toe va'aia loa e Alo le i’a ua toe manu a’e i luga ma fa’afuase’i ona fa'amaga lona gutu (tulou), ma ia folo atoa ai le paopao a Alo, ae o le taimi lea o lo ’o ta'oto ai Alo i totonu o lona paopao. Na fa’afuase’i ona pogisa atoa le va'ai a Alo ona o lea ua i totonu nei o le manava o le i’a, e le’i umi lava se taimi, ae nofo a’e loa le tama i luga ma tago atu i ana tama’i naifi 'ofe ua aumai ma amata loa ona selesele ai totonu o le tino o le i’a.

E le’i umi lava ona faia le galuega lea a le tama o Alo ae amata loa ona taumalua le alu a le i’a, peita’i sa fa’aauau pea ona selesele e le tama o Alo totoga o le i’a, ma ua atili ai lava ona sui le alu a le i’a, ua alu ma fa’atautu, o ni isi taimi e pei e tafiti ona ua amata ona vili tiga i vaega o lona tino lea ua selesele e le tama o Alo, ma e le’i umi lava se taimi ae fa’afuase’i loa ona fa’alogoina e le tama se patatu tele lava e peisea'i o ni mea ua fetoa’i, ma i’u ai loa i lona le toe fa’alogoina o le i’a o gaoioi. E le’i umi ae fa’alogoina e le tama leo o tagata o lo ’o pisa mai ma e foliga o lo ’o latou taumafai e sasa le tino o le i’a, ma ina ua manino i le fa’alogo a le tama gaoioiga a tagata o lo ’o fai, sa ia vala'au atu loa i ai e fai fai malie o ia o lo ’o i totonu o le i’a ne’i lavea.

Na mae'a ona galulue tagata i le taumafaiga lea o se 'auala a sao mai ai le tama o Alo i fafo, ma ina ua sau i fafo mai le manava o le i’a, na ia iloa ai e moni lava ua matua sosofa e le i’a le 'ele'ele matutu sa tua'oi ai Fusi ma Fausaga ma ua matua vaeluaina lava. Fai mai le i'uga o le mau a le atunu’u, na pena e tagata le tino o le i’a ae tufa, ae o le tama o Alo na toe fo’i i Savai’i ma lona igoa matai o “I’aulualo” lea na mafua mai ina ua ia ulu i totonu o le i’a ma mafua ai loa ona maua lona igoa matai.