Ads by Google Ads by Google

Vavau a Samoa: Tala ia Maui'a ma le ana o tagata pupu'u

O se tasi lenei o Vavau 'iloga a Samoa e le gata o ana tala tu'u, ae o tulaga fo'i i le tautuaina o aiga, ona o se mea ofoofogia ma uiga'ese sa tupu i totonu o le aiga o se tasi o matai i totonu o le nu'u o Paia i le motu tele o Salafai, le toea'ina o Maui'a. O le nu'u lenei o Paia, o lo o i ai le vavau a Samoa e fa'atatau i le ana o tagata pupu'u.O i'i fo'i lea na mafua ai ona le toe nofoia e tagata pupu'u tua maota o le nu'u o Paia, ina ua le osi feagaiga le toea'ina o Maui'a e tusa ai o a latou tu'ugatala sa faia ma tagata o le ana. Fai le tala, o se tagata mai le nu'u o Paia e suafa ia Maui'a, o ia lea na muamua taunu'u i le nofoaga po o le Ana o le 'Au Pupu'u. I se tasi aso, na o ai Maui'a ma lana ta'ifau e tutuli i le vaomatua.Ao i ai Maui'a ma lana ta'ifau i le vao i le la tutuliga, na fa'ate'ia Maui'a ina ua leiloa lana ta'ifau, ma ua fiu e toe autilo solo ua ia le toe va'aia lava mo se taimi umi, ona alo lava lea o le toea'ina i lana tuliga, ae ua le toe ano lava i lana ta'ifau aua sa i ai lona manatu, e toe fo'i ane lava lana ta'ifau ia te ia. Ao faia pea le tuliga a le toea'ina, na tei ina ua toe va'ai atu i lana ta'ifau ua toe alu atu i le atoa ia te ia, ma ua 'ese lava ona foliga, e pei ua fiafia e ala lea i le ta ta solo o lona siusiu (tulou), ma pei e tagi atu ia te ia, ma ua pei ai lava le ta'ifau ma ona uiga ua fa'aali atu o se tagata i le va'ai a le toeaina, ona o ona uiga fiafia nei ua fa'aali atu ia te ia, peita'i sa lei mamafa tele i le mafaufau o Maui'a aga ma uiga ia o lo o fa'aali atu e lana ta'ifau.Fai mai le tala, ua 'avea le le ano ane o Maui'a i lana ta'ifau ma itu ua tagi leotele ma ua leoleoa ai le ta'ifau, ua le gata i lea, ua fetamoea'i solo e foliga o lo o taumafai e fa'ailoa atu ia te ia se fe'au, e mulimuli atu i le mea lea o le a toe alu i ai. Ma ua 'avea le umi o le taimi na faia ai aga nei a le ta'ifau ma itu ua amata ai loa ona alu le mafaufau o Maui'a, e i ai le mea lea o lo o tupu i lana ta'ifau fua i le fa'apea atu ia te ia ae le masani ai, ma i'u ai lava i le mulimuli o Maui'a i le 'auala lea ua savali atu nei i ai lana ta'ifau, ma fa'ateia ai Maui'a ina ua la tau atu i se Ana.Fai mai le tala, e ui i le faigata ona sao o Maui'a i totonu o le Ana lenei, peita'i sa taumafai lava le ta'ifau e tata'i o ia i totonu, ma iu lava ina sao i totonu o le Ana, ma ia iloa ai, e faigata ona sao atu i le pito i luma o le Ana, ae o totonu, o se Ana tele ma e faigofie ona sao i ai. Fai mai le tala, ua taunu'u Maui'a i totonu o le Ana, ma ua ia va'aia ai lana ta'ifau ua toe tamo'e mai ia te ia, peita'i o le fa'aletonu ua tupu, ua ia le iloaina po o fea tonu le itu o le Ana o le a aga'i i ai.