Ads by Google Ads by Google

VAVAU A SAMOA: TAGATA POLENISIA MA LONA TUPUAGA

Vaega 2

 

I le agai mai ai la o le tala faasolopito i tagata Polenisia ae maise ai o Samoa, e talitonu ai tagata Samoa i aso ua mavae, o tagata Samoa na fai lava i totonu o Samoa, e lo latou atua o Tagaloa.

 

Atonu o le a le avea lenei talitonuga ma itu e ta’ta’iina sese ese ai talitonuga o tagata soifua uma i le olaga nei, o le Atua Soifua, o Ia e ou le atulaulau ma mea o loo tumu ai, o ia foi na faia le tagata i lona faatusa, peitai, ona o le taumafai e faamanino tulaga o tala i vavau ma mea sa talitonu ai Samoa ma  atumotu eseese o le Pasefika i aso anamua, o le itu lea o le a manatu ai le tusitala, o le a le afaina lea i se finagalo, peitai, e tumau pea lo tatou faaaloalogia o galuega o le Foafoaga a le Atua, lea o loo molimau ai le tusi o Kenese, na faia e le Atua le lagi ma le lalolagi i le amataga, o ia foi na faia le tagata, o le palealii lea o ana galuega, ina ua maea ona ia faia le lagi ma le lalolagi.

 

E i ai le talitonuga a Samoa i aso uma mavae i le nofoaga e taua o Pulotu, lea e potopoto uma i ai agaga o tagata pe a oti, ma o iina latou te talitonu, e toe fausia mai ai isi tagata, mai agaga o tagata ua oti. E i ai foi le talitonuga o tagata Polenisia e faapea, o Pulotu, o se nofoaga lea e mamao ese mai le latou nofoaga poo le nuu moni o Hawaiki, ma e talitonu nisi, e tutusa Pulotu ma le nofoaga lea e taua o Burutu poo Bureto lea o loo i le motu o Mesopotamia. O loo taua foi i ia talitonuga sa manatu e faapea, o le vaa tele lava a tagata mai Mesopotamia na folo e le i’a tele e taua o le Palata.

 

O le ala ua taua ai nei talitonuga, ona o loo i ai le fesootaiga ma le mau a tagata Samoa, ona fai mai o le talatuu i le folauga i Pulotu, e masani ona fetaui ai tagata folau mai Mesopotamia ma agaga o tagata ua oti i le vasaloloa. Fai mai o nisi agaga latou te fetaui e fetagisi atu, o isi agaga e to to e ma pepese atu i luga o le vasa, o nisi agaga latou te fetaui o loo fai atu a latou mea malie ae o isi o loo ta ta a latou laau pese ma fai atu a latou fiafiaga i luga o le vasaloloa. O le mau a tagata Samoa fai mai o Pulotu e i ai le vaituloto, lea fai mai a pa’i i ai le agaga o le tagata ona toe ola lea e le toe oti. O loo i ai foi le tolotolo tupito lava i le motu o Upolu fai mai e i ai le mea e taua o Fatuosofia, fai mai o iina e i ai ma’a e tu tu ai agaga, ona faaee lea mo le malaga atu i Salafai, i le nofoaga o loo i ai le Fafa o Saualii lea o loo i ai i le taufaasi’usi’uga o Savaii, ma, o le isi igoa o le Fafa e taua o le Luao poo Luavai, ma, fai mai e mau a Samoa, o Luavai lea e taua e tagata Maori o Honi-Wairua, lea e potopoto i ai agaga o tagata oti, ma o se mea loloto lava e i ai le faitoto’a, lea e ulufale atu ai i le ala e tau atu i Pulotu, ma e aliali mai la i lenei tala, e peiseai e lua ni loto o loo agai atu i Pulotu, o le tasi o le Lualotoalii ae o le isi o le Lualoto o tufanua, ae o le leoleo o le Fafa o Saualii, o Leosia.