O le mau lenei a le atunuu i le ietoga o le pipi'imaleeleele, lea na lalaga e le olomatua mai Sauano i Fagaloa e suafa ia Feagai, i luga o le mauti'eti'e e igoa o le Matagilemoe. Fai mai le tala, o le taimi lava na mae'a ai ona lalaga e Feagai le ie lenei, ona sulu ai loa lea ae nofo i le maota e igoa o le 'maota e nofoia tala', ae ua le nofoia le ogamanava o le maota. Fai mai le mau a Sauano, e mafua ona le nofoia le ogamanava o le maota, ona o iina e soli e Sauali'i pe a aga'i mai i le leva o le po mai Malata e aga'i atu i le sami i tai.

O le teine e igoa ia Tualafalafa, o le afafine lea o Tagaloaaliga i lana i le tama teine a Anivaolepo, le tama a Feagai, ma ua sauni nei e ave le si'i i le tu'umalo a Tagaloaalagi peitai o le mea ua tupu ina ua mae'a ona faapotopoto uma le si'i, ua le maua se ie lelei e ave ai le si'i, ona tonu lea i le manatu o le teine o Tualafalafa, o le a alu i Fagaloa ma ia afea ai loa le maota o Leutele o Lalomilo i Sauano.

Ua toso lona va'a i lalo o le laau o le milo ona faatali atu ai lea o tagata na malaga atu ma le teine, o ali'i ia o Taipelogia ma Taisamania. A'o le'i alu le teine, sa toe fesiligia o ia e Taipelogia ma Taisamania pe faapefea ona alu, na tali le teine, e alu i le mea o loo nofo ai le olomatua o Feagai, ona fai lea i ai o ali'i, "ua lelei, a e alu, ete tau atu i le vai pupu ma'a, ete tau atu ai i le papa lalaga ma le ma'a tao laufala ma si ona auala, a e alu i ai, ete alu faatafa, na e faatoa tau ai lea i le maota e nofoia le tala ae le nofoia le ogamanava."

Ona alu loa lea o le teine ma ua ia tau atu i mea uma lava e pei ona faamatala atu e ali'i ia e to'alua ia te ia, ae ina ua oo atu i le nofoaga o Matagilemoe, na ia vaaia ai le olomatua o Feagai o loo nofo mai, ae ua na o luga lava o lona tino e oo i lona sulugatiti o loo iloa atu, ae o le isi vaega ua lilo uma i le eleele, ona tagi aueue ai lea o le teine, ma avea ai ma itu na te'i ai le olomatua, ona geno atu lea o le olomatua i le teine e alu atu ia te ia.

Ua alu atu le teine i le mea o loo nofo mai ai le olomatua ona fesili lea i ai o le olomatua poo ai o ia, na tali le teine, o ia o le tama a Anivaolepo, ona oso lea o le alofa o le olomatua ma faapea atu, "talofa e i le tama asi a'u tama, o le mea sili ua e sau ae o lea ou te ola, ae sau loa e alu ma le ie lea aua ua tu'umalo Tagaloaaliga." Ona sau ai loa lea o le teine ua amata ona tau laga i luga ie ona ua pipi'i ma le eleele, ona faailoa lea i ai e le olomatua i le teine, o le ie lea o lona igoa o le pipi'i ma le eleele, ae afai e alu ma ia, ia sulu i lona sulugatiti ina ne'i gaoia e Sauali'i o le ala pe latou fetaia'i. Fai mai le tala e laga ane i luga le ietoga ua pipi'i uma ai palapala. O le a soso'o atu i le vaiaso fou le vaega lua o le tatou polokalame.