Ads by Google Ads by Google

VAVAU A SAMOA: O TONGA I SAMOA

vaega #2

 

Fai mai le mau a le atunuu, o le taua lea, e le’i umi se taimi na faia ai ona o le atamamai o Atua i le taua ma ua lava lelei a latou tapenapenaga, ma o le taua lenei o loo taua i talafaasolopito o le afioaga o Luatuanuu, o le Taua o le Taeao Fua, ma o le taunuuga o le taua, ua toe si’i le tuaoi o Atua ma Tuamasaga mai Asusu i Salelesi i le itu i sisifo i le ogaeleele e taua o “Muliapoaifasa”, le vaega tonu o loo i ai le vaitafe lea e tafe i totonu o le afioaga o Lauli’i, ma o le pine faamau o lenei mau, ona o se vaega o faalupega o le afioaga o Lauli’i o loo faatau aofai ai upu o Atua ma le Tuamasaga.

 

E tele isi igoa sa faaigoa i ai le ‘olo lenei e pei o le “Sauofafine” e pei ona faaigoa ai e isi tusitala Samoa, ona o le taimi na sulufa’i i ai Tupua Tamasese Titimaea ma ana vaega ‘au ina ua toilalo ia Malietoa Laupepa lea na faatafea i Sailusi ma Asi Taunupopo, Laulusa Tuiletufuga ma Mauga Manuma o Pago Pago, ma o gatai i le gataifale o Luatuanu’u o loo i ai ni ma’a tetele se lua lea e faapea le talitonuga o igoa o ma’a nei o Utuma ma Utumauu lea fai mai le tala na malaga mai le motu o Papatea ina ua fai le taua i le va o Tui Pulotu ma tagata Papatea.

 

Fai mai le mau a le atunuu, i se tasi aso, na alu ai le afafine o le Tui Pulotu e taele ae tuu feanu i ai le aualii o Utuma ma Utumauu, ma o iina na mafua ai loa ona to’atama’i le finagalo o Tui Pulotu ma mafua ai loa le taua i le va ma tagata Papatea, ona sosola ai loa lea o tama nei e to’alua o Utuma ma Utumauu ma o la matua o Ulu ma Malautea.

 

 Fai mai le mau a le atunuu, e eseese vaega na alu i ai le solaaga a le ulugalii ese fo’i le itu na aga’i i ai le solaaga a tama, ona o Samoa na faatutu aga’i i Samoa le la solaaga, mulimuli ane, ona malaga ai loa le ao le ulugalii i Samoa e saili le la fanau, peitai fai mai le mau a Luatuanuu na taunuu atu tama i Samoa ma liuma’a ai i gatai o Luatuanu’u, ma a’o aga’i pea le sailiga a le ulugali’i, na o la iloa atu le la fanau ua liu ma’a mai, ona liua ai fo’i lea o i laua ma ma’a i gatai tonu lava o Fagali’i ma ua taua lea vaega o le “Ma’atulua” Ma fai mai le tala, o motu nei o Pulotu ma Papatea, o nisi ia o atumotu sa i tala atu o le atunuu o Fiti, peitai o le taimi nei ua le toe i ai ona ua goto i le moana.