Vaega #1

O vaega muamua lenei o le tala i le tamaitai o Leutogi ma le pogai o le suafa Tonumaipe’a. O se tama’ita’i Samoa na nonofo ma le Tuitoga i Toga.

O se tasi lenei o tala e ofoofogia i Vavau o Samoa, ona o se gaioiga sa faia e manu nei o le pe’a, lea na mafai ai ona faasaoina le ola o se tamaitai Samoa sa nonofo ma le Tuitoga. Fai mai le tala, o le Tuitoga, e toalua ona toalua, o le Toga le isi ae o le tamaitai Samoa le isi, ma o lona igoa o Leutogi. O le mea ua tupu, e fanau le fafine Toga ae le fanau Leutogi, ona avea ai lea o le mea ma itu na ita tele ai Leutogi i le fafine Toga, ona ua ula ia te ia ma fai mai o ia e pa le fanau.

Ua oo i le tasi aso, ona alu ai lea o le taelega a Leutogi ma le fafine Toga i le vai, ona fai atu lea o le fafine Toga ia Leutogi, e tago e taofi atu lana tama sei alu muamua e taele, fai mai ao taele le fafine Toga, sa tago atu loa Leutogi i le tuaniu ma tutui ai le ulu o le pepe ma ua ee ai ua le mafai ona faana. Ua tamoe mai le fafine Toga peitai ua oti si ana tama. Na taumafai e vaavaai le mafuaaga na oti ai le pepe peitai na maua mulimuli ane o loo i ai le tuaniu i lona tumuai, ma ua leai lava se isi e tuuaia ua na o Leutogi.

Ua logo le Tuitoga i le faalavelave ua tupu, ona faatonuina ai loa lea e le Tuitoga tagata o lona malo ina ia pu’e atu Leutogi ma saisai ona vae ma lima, ma ia tafu se afi e susunu ai. Ua faia le faatonuga a le Tuitoga ma ua tafu foi le afi, ona ave lea o Leutogi ua nonoa ai o i ai le vaega tonu o loo tafu atu ai le afi i le laau o le fetau. Fai mai ao mumu sasae ae le afi, na faateia Leutogi ma le motu o tagata Toga ina ua latou vaaia le lalolagi o pe’a ua felelei mai ma tape le afi e ala lea i le faaaogaina o latou feau vai.

Na matua faateia le Tuitoga ma ona tagata i lea mea ua tupu, ma ua vaaia ai le pe ifo i lalo o le afi na sasao ae i luga. Ua ita tele le Tuitoga ina ua le mafai ona oti Leutogi e tusa ai o le mea leaga sa ia faia, ona faia loa lea o lana faatonuga ina ia ave Leutogi ma tuu i le motu tuufua, peitai e leai lava se mea e lilo i le vaai atu a Lafai Taulupoo i Samoa nei, aua o ia foi lea na faatonuina pe’a ina ia tape i le afi lea na se manu e susunu ai Leutogi.

Ua tuu nei na o Leutogi i le motu tuufua e leai se meaai poo se vai e maua ai, peitai ua faatonu foi e Lafai ana pe’a ina ia o ma ni meaai e fafaga ai Leutogi. I taimi uma sa i ai Leutogi i le motu tuufua, sa fai ma asiasi i ai le Sauai o Lafai, peitai e lei faailoa i le tamaitai, ae sa na o le alu atu lava ma tilotilo atu i ai, ona toe foi lea, ma o le pogai lena o le igoa o Tilomai, e faamanatu ai le taimi lea e masani ona alu atu ai le Sauai ma tilotilo i le tamaitai ma toe foi.