Ads by Google Ads by Google

Vavau a Samoa: O le tala ia Sina ma Afia

Alo maia le mamalu o le aufaitau, o le faaauauina lenei o le tatou Vavau, lea na faagata mai i le vaiaso na te’a nei i le taimi lea o loo tau saili ai e Laulu le mafuaaga e ala ai ona oo atu ivi i’a i uta i le vao i le mea o loo la i ai ma lana fagafao.

 

Ua tonu i le mafaufau o Laulu, o le a ia usu po mai lava i le taeao e soso’o ai, se’i ona mata’ituina poo ai lava lenei e aumaia nei ivi i’a i totonu o le pa o loo fafaga ai lana fagafao. Ua oo i le taeao po lava, ona ala usu mai lea o Laulu ua tatala ese lana tava’e mai le faga o loo i ai, ona faalele loa lea ae mulimuli ai i ona tua. Ua lele faata’amilo solo le tava’e ma oo atu ai i le sami, ona vaaia lea e Laulu ua faatifa le tava’e, ua toso lona fulu ma toe maua mai ai le isi i’a, o le mea ua tupu, ua le alo ese mata o Laulu i uiga o loo faia e le tava’e ma le mafuaaga e ala ai ona maua ana i’a. Ua oo i le po, ona tolotolo atu loa lea o Laulu ua se’i ese le fulu o lana tava’e, le fulu lea e fai mai ai le upu faa Samoa, “e auau pe mamae le tava’e,” ona ave lea e Laulu le fulu lenei ua fafau ai le pa fagota, lea e fai mai le mau a le atunuu a toso le pa lea, e tai foliga tutusa lava ma le mafua fo’i lea o le asipi poo le malolo, lea e mafua ona tosina i ai i’a.

 

Ma o le mea ua tupu, ua alu Laulu ua faata’ita’i lana pa fagota i le sami, ma fai mai le mau a le atunuu na fiu Laulu e tau sisi i luga le pa ua matua mama i le atu ona o le tele, ma e talitonu nisi o iina na mafua ai le isi muagagana faa Samoa e faapea, “e iloa le lelei o le pa lenei pe a goto ai lo’u va’a,” fai mai ua oo i le isi aso, ona o ai loa lea o Laulu ma se isi tagata e fai lo la faiva pe ua fagogota fo’i, ma fai mai le mau e tiga lava ona augani atu Laulu i le tagata lenei i le la vaa o le a goto ona ua amata ona le mafai ona taualo, ae fagota lava le tagata lea ma o le mea na tupu, na i’u lava ina goto le vaa ona o le mamafa o i’a, ma e talitonu nisi o iina na mafua ai le isi muagagana a le atunuu e faapea, “na tagisia lava e Laulu se va’a ia goto,” ma fai mai le mau a le atunuu, ina ua iloa e Laulu o le a oti i le sami, ona faapea atu lea i le tagata na la o e alu e ave le pa fagota ia Sina, ona maliu ai loa lea, ma o loo i ai lava le Aau o Laau i le vaega o le sami na maliu ai, e faamanatu ai le vaega na goto ai lona va’a.

 

O le vaiaso fou o le a faailoa atu ai le malaga faaauau a le pa fagota lenei, poo fea na i’u i ai.