Ads by Google Ads by Google

Vavau a Samoa: O le tala ia Sina ma Afia

E faatalofa atu i le mamalu o le aufaitau i lenei vaiaso, ae o le vaega mulimuli lenei o le tatou polokalame i Vavau o Samoa, ma le malaga faaauau a le pa fagota poo fea na i’u i ai, lea sa tatou tulimata’i maia i le tolu vaiaso talu ai, ae alo mai loa lau silasila o le toe faaauauina lenei o le tatou Vavau i lenei vaiaso.

 

E oo mai i aso nei e pei o le molimau a le itumalo o Palauli, o loo i ai pea lava le ‘aau e taua o le “Aau o Laauli,” e faamanatu ai le vaega tonu o le sami na malepe ai lona va’a ma maliu ai. O le mau lenei a Palauli i le mata’aga lenei i le pa fagota.

 

Ua tuana’i le maliu o Laulu, fai mai ona usu lea o le Tuifiti ia Magamagalefatua ona maua lea o ‘Alo’aloolela, peitai o le tama’ita’i lenei o Magamagalefatua sa faufautane i le La. Fai ma le tala, o le alii leneio ‘Alo’aloolela na tuli e lona tina e alu ia Po ma Ao ma le fale Tulutulu i tao, ma fai mai le mau, o soga a Po ma Ao, o Uila ma Faititili ma o le Fale Tulutulu i tao sa i ai pa fagota e lua, o le “Auomanu” ma le “Auomala”, na faatonu Aloaloolela e lona tina, e aua ne’i auamaia le pa fagota o le Auomanu, ina ne’i Auomanu, Auomanu, Auomala, ae lelei ona aumai le pa fagota o le Auomala, aua e Auomala, Auomala, Auomanu.

 

Ia fiafia le Tuifiti ua taunuu le pa fagota ae paga lea, e sese le fauina o le, ona alu lea o le ‘ausaga a Sina ma lana tama e saili se tasi na te fafauina le pa ia sa’o, fai mai e silia i le to’a sefulu tautai na ave i ai le pa e le sa’o lava, ona o loa lea ia Laulu ma faatoa sa’o ai iina le fauina o le pa fagota, ona toe fo’i mai ai loa lea o Sina ma lana tama, fai mai le mau, ona faasaga atu loa lea o le tama o Tautonu ua amata ona fagota mai i’a i le pa aua o lea faatoa sa’o lona faufauina.

 

Fai mai ua fafau e le tama fale e lua e tuu i ai ana i’a ona ua tele naua, o le fale o lupo lea na mafua ai le igoa o le nuu o Falealupo ma le fale o atu, ae ina ua oo i le tasi aso a’o pisi le tama i lana faiva, na ia iloa mai uta tagata o le nuu ua latou talepe i lalo o le fale o atu ae la’u ana i’a ua tunu faavela, fai mai ona sau lea o le tama ua uu i’a sa tunu ma lia’i.

 

Ua oo i le isi aso ona toe alu fo’i lea o le tama e fagota, peitai ua fiu si ona tina o Sina e faatali, o lea na mavae ai Sina i lona to’alua o Afi’a e faatali atu, ae se’i alu e saili mai le tama, peitai na fai le mavaega a Afi’a ia Sina ina o le a alu e faapea, “Sina, aua ne’i e faagalo mai Afi’a isi ona vao”. Fai mai na maua atu e Sina le tama i Palauli ae paga lea, e taunuu atu Sina ua alu le tama e su’e le pa ua motu, fai mai o le taimi lava na mou atu ai le tama o Tautonu, na liu ma’a ai ma lona tina o Sina, ma e fo’i mai le tama ua liuma’a lona tina. Soifua.