VAVAU a SAMOA: O LE ANAE LAUGUTU MUMU

E na o le afioaga lava o Pu’apu’a i le motu tele o Salafai e a’e ai le i’a lenei e taua o le i’a o le anae, ae ona o foliga o lenei i’a, e mafua ai ona faaigoa e tagata o le nuu o le i’a eva, ona o ona laugutu e mumu. O le masina o Mati e oo atu ia Iulai ma le masina o Iulai e oo atu ia Mati, o vaitaimi ia o le tausaga e a’e ai le i’a lenei i totonu o Pu’apu’a ma o le mau a le afioaga o Pu’apu’a, e oo mai lava i aso nei, o loo tumau pea le avea o Lemalu ma Tautai mo le fagotaina o le i’a ae o loo gafa pea Taala ma le vaaiga o le foe, ma o loo faaaogaina pea upega fagota mo le fagotaina o lenei ia e pei o le Sapo, alagamea ma le Fau.

 

O le i’a lenei o le anae, na maua mai ina ua malaga mai le tamaitai o Sinalefiti, le afafine o le Tuifiti e fia matamata ia Samoa, ona malaga mai lea o le tamaitai ma aumai lana fagafao poo le oso o lana malaga, o le i’a lenei o le anae. Ona o tagata i aso anamua sa foliga e itulua, o le ala lea na malaga mai ai le tamaitai o Sinalefiti mai Fiti, ma afe ai loa i le nuu o Pu’apu’a, ma mana’o ai ia ta’i atu sana sua i se tagata ola. Na muamua afe i le maota o Taala peitai e lei faia e Taala le mea o loo finagalo i ai le tamaitai, ona toe alu lea o le tamaitai ua afe i le fale o Lemalu, ma ua faasaga atu loa Lemalu ua ta’i le  sua a le tamaitai e ala i lona lava afafine, ona malie ai loa lea o le finagalo o le tamaitai o Sinalefiti.

 

Ua oo i le taimi o le a faamavae ai Lemalu ma le tamaitai o Sinalefiti, ona faapea atu loa lea o le tamaitai ia Lemalu, “Ua lelei, o le a ta faamavae, ae o le a avatu la’u i’a laugutu mumu lenei poo la’u anae, e fai ma a’u meaalofa mo oe ona o lou taliaina o lou mana’o, ma o lenei i’a o le a faatali lava i tausaga uma lava.” Ona faapea atu loa lea o le tamaitai ia Ta’ala, talu ai sa e teena a’u i le taimi muamua na ou manao ai i sa’u sua e ta’i mai i se tagata soifua, o le a e tau ma le la ma le timu i taimi uma e a’e mai ai le i’a lenei. Fai mai le mau a le afioaga o Pu’apu’a, a oo ina a’e mai lenei i’a, e na o Peseta lava ma Falenaoti e laei ae o tagata uma o le nuu e faasausau i le taimi nei a’e mai ai le i’a lenei, ma fai mai foi le tala, o i’a muamua lava e maua mai e faasa ona aai ai tamaitai sei vagana ai alii.

 

O le isi vavau o loo i totonu lava o le nuu o Pu’apu’a, o le tia lea o le tagata e igoa ia Gaina lea sa avea ma faao o le nuu o Leuo i aso uma mavae, aua fai mai le tala, ao lei nofoia e tagata Pu’apu’a, e tolu pitonuu sa nonofo ai tagata i aso ua mavae, ma o le isi lava lea pitonuu o Leuo. Fai mai ina ua latalata ina maliu Gaina, ona ia mavae atu lea i lona nuu e faapea, afai ae oti, ia tanu faatu o ia, ona tuua lea o le latou nuu e o e fainuu uma i Pu’apu’a. Fai mai le tala e oo mai lava i aso nei o loo vaaia pea le tiasa lea o Gaina o loo tu i luga ua liua e avea ma papa, ma o loo vaaia ai lava foliga o le alii i lea tia ae ua liua uma e avea ma papa.

Comment Here