VAVAU A SAMOA: FUSI POTOPOTO

O se tasi lenei o tala ofoofogia e pei ona talitonu i ai Faleupolu, i le auala na maua ai le matupalapala o Misa ma Aiono i soo se mea fai i le loaloa o le atu Samoa, ona o le latou feiloaiga ma le tamaitai, poo le Tupu Tafa’ifa o Samoa, le tamaitai o Nafua.

 

Fai mai le tala, o le feiloaiga lenei na amata ina ua tuu atu e le tamaitai lana palo poo lana tupua i le aualii lenei o Misa ma Aiono e amata ai le latou feiloaiga, ma o taimi ia o loo tau saili ai se malo o Samoa, ae o loo avea le tamaitai o Nafua ma Tupu Tafa’ifa i ia ona po, ma o le pogai lea o le saili malo i ai o Misa ma Aiono, ma o le mau la lenei faa faleupolu e tusa ai o lenei feiloaiga.

 

O totonu o le nuu o Tufutafoe i le motu o Savaii, o loo i ai le vai lea e taua o le Vai o Nafanua lea o loo faaigoaina o le “Fusi Potopoto” poo le “Vai a Nafanua.” Fai mai o iina na feiloai ai Misa ma Aiono ma le tamaitai o Nafanua.

 

Fai mai o le aano o le malaga a Misa ma Aiono, o le la sailiga malo ia Nafanua peitai e taunuu atu le malaga a alii, o loo faamalu le tamaitai.

 

Fai mai e lei toe faatali Misa ma Aiono ina ua la tau atu i le tamaitai o loo faamalu mai i lona vai, lea ua avea nei o se tasi o Vavau iloga o Samoa i le motu o Salafai, ae ua la faailoa atu i ai le auala o le la savali, aemaise ai o le faanaunauga ina ia maua se ao mo Samoa.

 

Ua maea ona faailoa e Misa ma Aiono le la savali i le tamaitai ona faapea mai lea o le tamaitai, “Ua lelei o le mea sili ua ou maua atu le auga o le lua savali, ae o mai sei o tatou tauva poo ai e umi le taimi e nofo ai i lalo o le vai, sa usitaia e Misa ma Aiono le talosaga a le tamaitai ma ua faapea loa ona latou tauva maulu.

 

Fai mai le tala, ua amata le tauvaga maulu a alii nei ma le tamaitai, ma ua agai atu i le faliu o le la i lona nofoaga, o loo faia pea. O le mea ua tupu, ua amata ona le tau le totofu Misa ma Aiono ona ua la lagonaina le vaivai o la tino. Ua iloa e le tamaitai le mea ua tupu, ona ia fesili lea i alii, pe i ai se mea ua tupu ua mafua ai ona la le toe totofu.

 

Sa tali mai Misa ma Aiono, “Ioe lau afioga Nafanua, atonu ua e silafia lava, silasila foi oe, ua faliu le la i lona nofoaga, ma ua oo mai foi le vaivai o ma tino, ona e lei maua lava se faamalositino talu ona ma taunuu mai iinei.”

 

Ona faapea atu loa lea o le tamaitai o Nafanua, “Ua lelei, ua ou iloa lava e lei faia se tali o le lua malaga, ae ui o lea, faita lava lua te ausulusulu mai iinei, e te lua saili i Ao o Malo, ao lenei o palapala malo.” Fai mai o iina na faatoa maua ai loa le matu palapala o Misa ma Aiono i soo se mea e fai i le loaloa o le atunuu ma Satuala.

Comment Here