O LE TALA IA LAKE MA TOPOLEIO le tala ia Lake ma Topolei le auauna a Tuisamau, na mafua mai ina ua alu Topolei e saili le Lupeuluiva a Tuisamoa, peitai e taunuu atu ua uma ona fasi mate e le tagata lenei o Lake, ma o se tasi lenei o tala tuu e i ai nisi o Vavau na maua mai ai. I le pito nuu o Aopo e taua o Letui, e i ai se nofoaga e taua o Talagagaau ma e oo mai i ona po nei o loo faaigoaina ai pea le nofoaga, ona o se tasi o tala sa tele ina ia eseese ai talitonuga a le au failauga Samoa, peitai ona o Samoa e i ai pine faamau o ana talatuu, o le pogai lea e le o mafai ai ona fesiligia le moni ma le faamaoni i lenei tala e uiga i le Lupeuluiva a Tuisamoa. O le nofoaga e taua o Talagagaau, ua liua e avea ma papa peitai o loo mafai lava ona faailoa mai mea sa tutupu ai i luga o lea papa, pe afai e vaavaai lelei i ai ma le toto’a. O le nofoaga lenei o le Talagagaau, na mafua mai i le taimi na fasi mate ai e le tagata Aopo e igoa ia Lake le Lupeuluiva a Tuisamoa mai Falealii, e pei ona faamaonia mai e tagata Aopo i le latou mau o loo i ai nei. Fai mai o luga o le papa, o loo loga lelei ai gaau (tulou) o le lupe i le taimi na faavai ai e Lake, ae o tafatafa ane o le nofoaga lea o loo i ai se ogaumu, fai mai le mau a Aopo o le ogaumu lea na faavai ai e Lake le lupe a Tuisamoa.O le tala tuu fai mai, o le lupe lenei a Tuisamoa, na lele mai Falealii ma agai atu i Aopo, ae o le taimi lea o loo toto tiapula a le tagata lenei o Lake i lona maumaga. Na faafuasei ona vaaia e Lake le punitia o le mata o le la, ae o le taimi lea ua faapepepepe ai le lupe i luga tonu o Lake ma faigata ai ona toe iloa atu le pupula mai o le la. O le taimi lea na tago atu ai loa Lake i le ‘oso ua auato ai le lupe ma pau mai ai i lalo ua mate. Ona alu atu lea o Lake ua aumai le lupe ua faamama ae tuu lona gaau i le nofoaga lea ua faaigoaina nei o Talagagaau, ona ia pusa ina lea o le suavai ae faavai ai le lupe, ona alu loa lea o lana taelega i le vaitafe. Ua fiu Tuisamoa e saili lana lupe, ona ia faatonu lea i lana auauna pe o le tagata e taua o le soga e igoa ia Topolei, e alu e saili mai lana lupe poo fea o i ai. Ona alu loa lea o le soga a Tuisamoa e saili le lupe ma ua oo i Aopo, ma fai mai le mau a Aopo, e alu atu Lake e taele i le vai, ae fetaui ma le soga a Tuisamoa o loo sau e saili le lupe. Sa fesili le soga ia Lake pe na te lei iloaina le lupe a Tuisamoa ae tali Lake ua uma ona faavai, fai mai o le taimi lea e lei toe faatali ai loa le soga a Tuisamoa ae ua tau loa ma Lake. Fai mai na umi se taimi o faataututu pea Topolei ma Lake, peitai na iu le taua ina ua toilalo Topolei le soga a Tuisamoa ma maliu ai. O le mau a Aopo, na maliu Topolei ma tanu ai lava e Lake i le mea na la tau ai, peitai ua faigata ona iloa ona o le vaega tonu lava lea ua alu ai i luga le alatele o le malo. Peiai e mau eseese Falealii i le tala lenei, ona fai mai le mau a Falealii, na manumalo Topolei i le la fetauiga ma Lake ma maliu ai Lake, aua fai mai Falealii, o le mau o le latou tala, ana toilalo Topolei se manu o tauosi mai i aso nei ni faia.