Ads by Google Ads by Google

Vavau a Samoa

O LE POGAI O LE 'AVA I SAMOA, vaega #1

E taofi eseese Samoa i le malaga faaumiumi mai a le 'ava i Samoa, lea e talitonu nisi na mafua ai le tele o igoa eseese ua ave e Samoa i le 'ava. Aua fai ai le mau a le atunu'u, i aso anamua, sa leai se laau o le vaomatua e le'i tofoina, aua o le 'ava sa tele ina faaaoga i aso anamua, (o le valu mai lea o le pa'u o le vi ua palu i le suavai, ona inu lea e pei ona faia i le taimi nei) fai mai la o isi laau e tofo atu o latou a'a e mamala ae o isi laau e tofo atu o latou a'a e oona, ae ina ua tofo atu a'a o le 'ava, e magalo ona a'a ae fitifiti ona ata.

Fai mai le mau a isi e 12 'ava eseese a le atunu'u, ma e fesuisuia'i lava o latou igoa, fai mai o isi taimi e faaigoa ai o le 'ava'ava aitu, pe a o'o ina faalao le masina ona o mai lea o aitu ua gaoi atu le 'ava.

Ae o le tala lenei i le malaga mai a le 'ava, na alu le seugalupe a le toeaina o Faleseu i se tasi aso, peita'i e fo'i mai le toeaina ae fetaui fo'i ma le fo'i mai o le faiga tuitui a lana fanau teine o Sina'atatasi ma Sina'atalua, ona fesili lea i ai o le toeaina poo fea sa o i ai, ae tali teine sa o e fai tuitui, ona ita lea o le toeaina ma lafoa'i ato tuitui i le togavao, ma fai mai o le mafuaaga lena o le tele o le vao tuitui i tua o Fagali'i e o'o mai i le taimi nei.

Fai mai le tala ua sola le toeaina i Siumu ona o le ita tele i lana fanau, peitai sa mulimuli atu ai lava tamaitai nei i tua o le la tama, ma e taunuu atu i le isi vaega o le atunuu, o loo toto fa’i mai ai le tama o Faletunatuna i le togafa’i a le Malietoa, ona tuu ane lea e Faletunatuna o aufa’i tetele e lua i le toeaina, o le aufa’i o le Solatetele ma le Ululatetele, ona fofoe lea e tamaitai nei o fai ae ai mata.

Ina ua taunuu le latou sopo i Mulifanua, ona fetagofi atu loa lea o tamaitai nei ua sili mulifa’i ia na totoe mai i le la aiga fa’i i luga o le laau, ona faaigoa ai loa lea o lea ogaeleele o Siligafa’i ma o loo oo mai pea i aso nei. Sa faaauau teisi atu le malaga ae latou tau atu loa i tagata mai Fiti, o loo asu vai i le vai tele sa i ai, fai mai o tagata Fiti nei na malaga mai e saili atu se fofo mo le gasegase o le Tui Fiti, ona malaga loa lea o tamaitai nei ma tagata Fiti ina ua laua tauanauina tagata Fiti latou te o.

Fai mai le tala ao alu le malaga i le vasa, sa inu e tagata Fiti a latou niu ma tauai i le sami aano, peitai na fetagofi atu tamaitai nei ua aumai aano nei ma utu i ai le sami, ona tuu lea i lalo o le liu o le vaa, ona alu pea lea o le malaga ma ua taunuu i Fiti, ona fesili lea o le Tui Fiti pe ua maua mai se fofo o lona gasegase, sa tali le au malaga, e leai se fofo na maua, sei vagana ai tamaitai Samoa e toalua na latou malaga mai, peitai na tali le Tui Fiti, “o le fofo tonu lena o lou gasegase sa ou mana’o ini a’u ava,” ona avea loa lea o tamaitai nei ma ava o le Tui Fiti. O le a toe faaauau atu i le vaiaso fou le tulaga na oo i ai le  aiga o le Tui Fiti ma tamaitai Samoa e toalua lea ua avea nei ma ana ava.