AUOMANU MA LE AUOMALA

Vaega #3

Manatua fo’i na gata mai le tatou Vavau i le vaiaso na te’a nei i le taimi lea ua tauva ai Manaia i le tau’aiina o le fua o le ‘ulu ma le tuutuuga, o le tagata lava e pau ai le ulu o ia lena e nonofo ma le tama’ita’i lalelei o Semalamamailagi. O tuutuuga ole tauvaga, e na o le po lava e mafai ona tau’ai ai le fua o le ‘ulu. O Manaia uma ia sa auai i le tauvaga, sa nonofo uma i le mea e igoa o Falepogi i le nu’u o Salea’aumua. E taunu’u atu la Alae, ua atoa aso e 6 talu ona tau’ai e Manaia fua o le ‘ulu ae le’i pau lava i lalo, e leai fo’i se togi o tau latalata i tafatafa o le fua o le ‘ulu. Fai mai le tala e lei toe fa’atali Alae, ae na tago atu loa i lana Pa ma lia’i ai le fua o le ‘ulu, ma alu atu ai le Pa ua tau i le ma’ave’ave o le ‘ulu, ma tete’i uma ai Manaia i le palasi ifo i lalo o le fua o le ‘ulu, ma o iinei lea na mafua ai se tasi o upu a le atunu’u e fa’apea, “Ua togi le pa tau i le ave,” e fa’amanatu ai le taimi na togi ai e Alae le ‘ulu i lana Pa ma alu atu ai le Pa ua tau i le ma’ave’ave o le ‘ulu, ona aapa atu loa lea o Alae i lana Pa ua toe uu mai ma fa’aauau loa lana savaliga aga’i i Siumu. Ua taunu’u le tama o Alae ma le Pa i Siumu, ona amata ai loa lea ona ia fagotaina le Pa, ma avea ai fo’i o ia ma tautai iloga o le mata Aleipata i na fo’i taimi, i le ‘aina o lana Pa atoa ai ma le tele o i’a e maua i ana faiva.

Sei o tatou toe liliu atu lava ia Sina ma Taotunu i Savai’i. Ua vaaia e Sina le fa’anoanoa tele o si ana tama o Taotunu ina ua motu lana Pa Fagota, ona manatu ai loa lea o Sina, o le a alu i Upolu e saili le tagata lenei o Alae na sola ma le isi pito o le Pa a lana tama. Ua umi se taimi na toesea ai Sina mai lo la aiga ma si ana tama, ma o se sailiga faigata fo’i sa feagai mai ia, ui o lea, sa i’u lava ina maua e Sina le tagata fagota lenei o Alae, ma tauanau loa e Sina la te nonofo, ona o le naunau lava o Sina ia toe maua mai le Pa a si ana tama o Taotunu. Ua tele aso o le mafutaga a Sina ma Alae, ma ua fa’ailoa fo’i e Alae ia Sina le tatau lea ona ia fa’apelepele i lana Pa Fagota o loo mafua ai ona avea o ia ma tautai ta’uta’ua i le mata Aleipata. I se tasi aso na alu ese ai Alae ma le la fale ma Sina, na maua ai loa le avanoa o Sina e toe sola ai ma le Pa i Savai’i, ma toe tuu atu ai loa le Pa ia Taotunu, ona toe amata fo’i lea ona fagota e le tama le Pa ma le loto fiafia, ma amata ai loa fo’i ona toe tele i’a o ana faiva sa fai, ma ua toe fiafia fo’i le nu’u i faiva a le tama.

Se’i o tatou liliu atu lava i le tagata lenei o Laulu, lea fai mai o ia tonu lea sa fafauina le Pa Fagota lea ua fa’aaogaina nei e Taotunu e fagota ai. Fai mai le tala, o Laulu, o se tautai iloga o le vasa, sa i ai sana Tava’e sa fai ma ana fagafao, sa tausi i totonu o lana faga. O se tagata e alofa tele i lana fagatoa Tava’e, ma o taimi uma lava e lele ai le Tava’e e mulimuli ai fo’i Laulu, afai e elle le Tava’e i le sami e aau ai fo’i, afai e lele i atumauga e alu ai fo’i e vaai le vaega tonu e lele i ai lana fagafao.