AUOMANU MA LE AUOMALA

Vaega #2

Manatua fo’i na gata mai le tatou Tala o le Vavau i le vaiaso na te’a nei ina ua talepe e le tama i lalo le tama’i fale se teu ai ana i’a o le atu, ae tu pea le fale sa teu ai ana i’a o le lupo, ma fai mai le talitonuga, o iinei tonu na afua atu ai le igoa o le afioaga o Falealupo, e fa’amanatu ai le fale sa teu ai lupo a le tama o Taotunu. O i fo’i na fa’atoa maua ai le igoa o le tama o Tautunu poo Taotunu, e fa’amanatu ai le taimi lea na alu atu ai le tama o loo tunu mai e tagata o le nu’u ana i’a, ae o isi i’a o loo tao mai i le umu, ona alu atu lea o le tama ua lia’i uma i luga i’a sa tao ma tunu ae tia’i i le sami, ma ua ai loa le igoa o le tama o Tautunu poo Taotunu fo’i.

E ui i le le fiafia o le loto o Taotunu i amioga a le nu’u ua fai i ana i’a, ae sa le fa’avaivai ai le tama e fagota, ma fai mai le molimau, e mata’utia faiva sa fai e Taotunu i na ona aso, o ni faiva e ese le mau, tele le i’a ma ua aai fiafia ai tagata o le nu’u atoa. Ua aave tala o le poto ma le atamai o Taotunu e fagota, ua taia ai le fa’alogo e nisi o tagta tautai iloga o Samoa, ona latou manatu ai loa, o le a latou asia le tagata lenei o Taotunu pe aisea e mata’utia ai le lelei o ana faiva, ma se’i fesili i ai poo ai e tupuga mai ai, ae pe o ia fo’i o se tasi e tupuga mai i aiga Tautai o Samoa. Ao fai le faiva a Taotunu i le isi aso, sa fa’afuase’i ona ia vaaia le ali’i Tautai mai Siumu o Alae lona igoa, ua alu atu e fia matamata i lana Pa Fagota aemaise ai o le auala o loo faia ai lana faiva, ona tauanau lea e Alae ia Taotunu pe mafai ona la ti’eti’e i lana va’a la te fa’agogota fa’atasi, ma se’i matamata i lana Pa Fagota, ae sa fai i ai le tama o Taotunu, e sili pe a fa’anoi muamua i lona tina o Sina. Sa fa’anoi Alae ia Sina ma malie ai loa Sina e alu Alae se’elua ma Taotunu i lana faiva.

Ua alu le faiva, sa ofo Alae i le manaia o le Pa Fagota a Taotunu, e ese le ‘ai o le Pa Fagota. E lei umi ona alu le faiva, ae motu loa le Pa Fagota, ona manatu lea o Taotunu, ai o se i’a lapo’a na motu ai le Pa, ae le iloa, na momotu e le tagata lenei o Alae ona o le mana’o e fia alu ma ia le Pa i Upolu e fagota ai i lona nu’u o Siumu. Ua fo’i fa’anoanoa Taotunu i le fale ma ta’u ia Sina le mea ua tupu, ua motu le Pa i le i’a, peita’i na iite Sina, e le’i motu le Pa i se i’a, o le Pa na momotu e Alae, ae o le taimi fo’i lea ua toe fo’i fiafia ai Alae i lona aiga ma le vaega o le Pa. Taoto la Taotunu ma Sina sei uma ona tatou toe liliu atu lea i ai, ae se’i tatou tulitataoina le malaga a Alae ma le Pa lea ua fo’i nei ma ia i lona aiga. Fai mai le tala, na ona taunu’u lava o Alae i Upolu, e le’i alu sa’o i lona aiga, ae ua ui atu nei i le mata Aleipata ona o le mimita i lana Pa Fagota lea ua maua. E fetaui lava la le taunu’u atu o Alae i le nu’u o Ulutogia i Aleipata, o loo tau’ai mai e tagata e to’atele le fua o le ‘ulu, o tagata nei e to’atele, o Manaia mai nuu eseese o loo fia fa’aipoipo i le tama’ita’i o Samalamamailagi, o le tuutuuga la lea ua fai, o le Manaia e pau ai le ‘ulu, o ia lena e nonofo ma le tama’ita’i laleiei lenei o Semalamamailagi.