Ads by Google Ads by Google

VAVAU A SAMOA

AUOMANU MA LE AUOMALA

 

Vaega #1

 

E fa’atalofa atu Samoa le atunu’u pele. O se tasi lenei o Vavau e taofi eseese ai le atunu’u. O le Tala i Pa Fagota sa fa’aaoga e Samoa i aso ua mavae. Fai mai le taofi a ni isi o le atunu’u, o le Pa Fagota lea na afua mai ia Laulu, ae talitonu fo’i isi, o le Pa Fagota lea a Sina le tina o le tama o Taotunu, ae fai mai isi taofi, o le Pa Fagota lea e le tama o Alae mai Siumu. O se tasi la lenei o mau a le atunu’u e fa’atatau i le tala e uiga i Pa Fagota.

 

Fai mai le tala, sa i ai le ulugalii o Afi’a ma Sina sa nonofo i le togavao, ma si la tama e to’atasi o Taotunu poo Tautunu fo’i lona igoa. Talu ai o le tamaloa o Afi’a e ese lava ona foliga, na mafua ai ona mau pea le aiga lenei i uta i le togavao ma nonofo ai mo se taimi umi, o iina fo’i lea na tupu a’e ai le tamaititi lenei o Taotunu. Fai mai sa fa’ateia Sina ao nofonofo i lo latou fale lauvao i le isi aso, ina ua alu atu i ai le tagata fagota lenei o Laulu ma avatu i ai le Pa Fagota, e fa’aaoga e fagota ai si ana tama. Fai mai le mau lenei, o le tagata tonu lava lenei o Laulu na fa’atoa sa’o ai le fafauina o le Pa Fagota a le Tui Fiti. Fai mai le tala, ina ua mae’a ona tuuina atu le Pa Fagota ia Sina, ona manatu loa lea o Sina, ua tatau ona la fo’i ma si ana tama o Taotunu i le aai e nonofo ai, ma amata ai ona fa’aaoga le Pa Fagota, aua fo’i e le mafai ona fa’aaoga i le vaomatua o loo latou nonofo ai.

 

E ui i le faigata ia Sina ona logo isi ona to’alua o Afi’a le tonu o le a fai, ae sa mafai lava ona ia logoina Afi’a ma fa’ailoa i ai, o laua ma Taotunu lea ua faamoemoe e fo’i i tai i le aai se’i faaaoga le Pa Fagota i le sami pe lelei i se fagota. Ua fa’amavae Afi’a ma Sina ma Taotunu, ona sauni loa lea o Sina ma si ana tama o le a fo’i atu i le aai, ae fa’apea atu upu a Afi’a ia Sina, “Sina, afai e te lua o ma si o’u atali’i, aua ne’i fa’agalo mai Afi’a i si ona vao,” ma o iinei tonu lea na afua atu ai se tasi o muagagana o loo tele ina fa’aaoga e Faleupolu i a latou folasaga, “Aua ne’i galo Afi’a isi ona vao,” e fa’amanatu ai le mavaega a Afi’a ia Sina si ona to’alua.

 

Ua tete’i le nu’u ina ua latou vaaia Sina ma lana tama o Taotunu atoa ai ma le Pa Fagota, ma ua amata nei ona fagota e Taotunu le Pa, e mata’utia le tele o i’a sa maua ai, ua fai fai pea faiva a le ali’i i lea aso ma lea aso, ua maua mai ai ituaiga i’a eseese e pei o atu ma lupo, ae ina ua vaai atu le tama i le tele o le i’a, o lea na ia manatu ai loa o le a fau ni fale e tuu ai ana i’a ia o loo maua mai o le atu ma le lupo. A a’e mai le faiva a le tama ona tuu lea i totonu o tama’i fale ia ua mae’a ona fau ia i’a, ae toe alu i tai e fagota, peita’i ua ese le mea ua tupu i loto o tagata, ua tupu le mana’o tele ma le mata pe’ape’a, ua aga’i atu tagata o le nu’u ma la’u i’a a le tama i o latou aiga, ae o isi ua latou la’u i’a ona ave lea ua tao isi i’a ae tunu isi i’a. E le’i toe fa’atali le tama i le taimi lea, ae ua tamo’e mai loa ua talepe i lalo le fale sa teu ai i’a o le atu ae tau’ai i’a i le sami, se’i vagana ai le fale sa teu ai i’a o le lupo sa tu pea e le’i talepe e le tama i lalo.