Ads by Google Ads by Google

Vavau a Samoa

POGAI O ISI IGOA I AANA MA FAASALELEAGA

 

O se tasi lenei o Vavau a Samoa e i le mafua’aga o igoa o ni isi o nu’u i le Faasaleleaga i Savai’i.

Na faaauau mai pea le taua ma ua oo atu i le ogaeleele lea ua igoa nei o Salefo’i, ona fai atu loa lea o le soaseu a le alii, “ta foi ia e faaauau le ta seuga ua lava lena taua, ae na tali atu i ai le alii e faapea, “e sa ona ta toe fo’i leaga o lea ua ta latalata atu i le aai, ae sili ona e faamalosi mai pea e tau le taua.” Fai mai le talitonuga a Faasaleleaga, o iina na faatoa maua ai le igoa o le auala o “Salefo’i”, lea e oo mai lava i aso nei o lo o faaaogaina pea e tagata o le nuu.

O le isi igoa sa maua ai i le taua lea, o le fasi ogaeleele e taua o “Matagalu.” Na mafua ona maua lea fanua fai mai le tala, e fetaui lava le a’e atu o Letufuga i le a’ega ae ona vaaia atu galu o le sami, ona ia faapea lea i lona soatau, “ua ou iloa atu i o’u mata galu o le sami o lo o fafati mai.” Fai mai ua matua tele le fasi a Letufuga ma ua sulu le toatele o tagata A’ana i le sami, ae o le taimi lea o lo o fetamo’ea’i solo le alii i uta i le vao, ae fetaui ma le iloa atu e le Tuia’ana, ona fesili lea o le Tuia’ana i lana autau, “O ai le la e ma’alo solo ane i le vaomatua,?” ae alu atu le tali a tagata na sulu solo i le fia ola, “Se o Letufuga,” fai mai o iina na faatoa maua ai loa se tasi o upu a le atunuu, “O Letufugama’alo’alomaivao,” e faamanatu ai le taimi na vaaia ai le alii o ma’alo solo ane i le vaomatua. O iina fo’i na maua ai ma le igoa o le isi tama’i motu o Nu’unefu, e faamanatu ai le taimi na nenefu ai le sami ina ua sulu i ai autau a A’ana i le fia ola.

Fai mai le tala, e latalata atu loa Letufuga i le vaega tonu i tai o lo o tu mai ai le Tuia’ana, ae tula’i loa le Tuia’ana ma faapea atu ia Letufuga, “Letufuga e, o Letufuga Pule Oe, o Letufuga To’atama’i oe, o Letufuga Alofa oe, alala ia i lalo ua e toa, ua e malo, o lo’u afafine lalelei lenei o Faauluulumaga I o le a avatu lua te nonofo e fai ma togiola ia a’u ma o’u tagata.” Fai mai o iina na maua ai le igoa o le atalii o Letufuga ia Faauluulumaga I, le tama o Alalatoa ma le teine o Fitimale’ula, ma faasolo mai ai lava lea o le gafa seia oo mai ia Salamasina le ulua’i tupu tafa’ifa a Samoa, ma faasolo atu ai lava lea o le gafa seia oo i le taimi na usu ai Fuimaono ia Oilau, faaee le gafa o Tupua Fuiavailili na saesae laufa’i ai Tumua.

O le faaiuga lena o le tatou tala i nisi o Vavau a le atunuu. Soifua.