Ads by Google Ads by Google

Vavau a Samoa

NA AFUA MAI FEA TAGATA POLENISIA? #1

O se tasi lenei o fesili tele e le o mafai ona taliina i le taimi nei, aua e le gata o se isi lea itu taua i tala faasolopito o Samoa, ae o se tasi foi lea o itu taua i le tele o ona Vavau, o le sailia lea o le pogai na mafua ai tagata Polenisia.

I aso ua mavae, sa leai ni faamaumauga i pepa poo ni api e maua ai faamaumauga i mea sa tutupu i totonu o Samoa faapea ai le Pasefika, aua sa leai nei ituaiga mea faigaluega, ae sa tele ina tuu taliga ma tuu gutu mai e tuaa o aso ua mavae, faamatalaga e uiga ia Samoa ma lona tupuaga e aofia ai ma le pogai na maua ai tagata Polenisia.

O nisi foi auala e mafai ai ona faa faigofie ona tuuina atu se tali e tusa ai o lenei fesili, o le taumafai lea ina ia faatusatusa aganuu a nisi o atunuu e pei o Samoa, Tonga, Maori, Hawaii ma isi lava atumotu o le Pasefika, ina ia faa faigofie ai ona manino se tali o lenei fesili. O nisi foi o itu e tai foliga tutusa ai atumotu nei, o a latou talatuu, e pei ona i ai talatuu e uiga i a Lata  poo Rata, Maui ma Tigilau, aua e le gata ina tai foliga tutusa o latou talaaga, ae tai foliga fetaui foi a latou mea na fai.

O loo i ai pine faamau o mea na tutupu mai ia Maui, Lata ma Tigilau, lea foi o loo avea ma nisi o Vavau taua o le atunuu, ma, o se taimi ona tatou agai atu lea i ai, ina ia manino ai le tulaga o talatuu a Samoa mai aso anamua, ae o le mea e ao ona silafia, poo fea na aga’i mai ai tagata Polenisia ma nofoia atumotu ua taua nei o le Pasefika i Saute lea e pei ona tatou i ai i le taimi nei. Fai mai i aso ua mavae, sa i ai tagata lanu eena e nonofo i le itu i Saute Sasa’e o Asia e taua o Melei Polenisia. O le mea ua tupu, ua latou malaga ese mai Saute Sasa’e o Asia ma ua agai atu i isi atumotu o le Pasefika ma nonofo solo ai, ma o a latou aganuu ma olaga i aso fai soo, e tai foliga tutusa lelei ma soifuaga o tagata Samoa.

Fai mai le mau a tagata popoto i talafaasolopito, ao agai mai folauga a tagata Melei Polenisia i atuvasa o le Pasefika, sa afatia la latou folauga, ma malepelepe ai o latou vaa, ona taapeape ai foi lea o i latou, ma ua agai atu lava le tagata i le motu e mapu ma ola ai. O nisi ua taunuu atu i le Penisula o Melei ma agai atu ai motu tetele o Initonesia ae o nisi ua agai atu i atumotu o le Pasefika ma aumau solo ai, peitai fai mai le mau a tagata popoto, e le o ni nuu moni nei o tagata Polenisia pe a fua atu i ai i le atamamai ma le popoto e folau mai mea mamao na malaga mai ai, peitai ona ua afatia a latou folauga, o le ala lea ua aumau ma nonofo solo ai i le Pasefika. Fai mai la le mau a tagata popoto i talafaasolopito, na iu ina agai atu tagata Melei Polenisia nei ma mafuta i tagata eseese e pei o tagata Ariana, Tipeta, Arapi ma isi lava ituaiga tagata sa i ai i ia onapo, ona tupuga mai ai loa lea o ituaiga tagata ua faaigoaina, o tagata Polenisinia, ma, o ni tagata foi e atamamai toe popoto i le folau.

E faia pea