O LE ULUA'I AFI I SAMOA

O le vavau lenei i le tagata o Maui, o lo o ta'ua ai e fa'apea, o ia le ulua’i tagata na mafua ai ona maua le afi i Samoa, o lona igoa atoa o Maui-ti’eti’e-i-Talaga, ona so o se taimi lava e fealua’i ai le fafine o Talaga, e ti’eti’e ai lava lana tama o Maui i lona tau'au. Fai mai le mau a Samoa, o Maui na fanau mai o se alualutoto, ona manatu lea o lona tina e tia’i ia te ia ina ia oti ai ona ua na o ia o se alualutoto, ma ia tia’i ai ia te ia i le sami, peita'i e le’i mananana’o i ai atua ona fai lea o le fa'atonuga a atua i galu o le sami ina ia 'ave le alualutoto lea ua tia’i atu i le matafaga e tu'u ai, o le a i ai le tagata na te tausia.

Ua alu aso ua tino le tama ma ua ola, ona savalivali ane lea i le isi aso i le matafaga ae o la fetaia'i ai ma se tama’ita’i, ma sa fa'ailoa e atua ia Maui, o lona tina lea, ona fa'amatala lea e Maui i le tama’ita’i na la fetaui le tala'aga atoa o ia, ona oso lea o le alofa o le tama’ita’i i le tama, ma ia 'ave ai ia te ia, ma o taimi uma lava e fealua’i ai le tina o  Maui, na te fa'ati’eti’e ia te ia i lona tau'au.

Ua tupu malosi ma lalelei le tama o Maui, ae o le taimi lea o lo o galue lona tama o Maeatutala i le va'aia lea o le fa'atoaga a le Sau'ai o Mafui’e, lea fai mai le tala o le Sau'ai lenei e nofo i lalo o le manava o le 'ele'ele.

O le mea ua matauina e Maui, o taeao uma lava e ala mai ai ua leai lona tama ma e le iloa e le tamaitiiti po o fea e alu i ai, ae te’i lava i le afiafi ua savalivali mai lona tama ma sa latou amoga mea'ai, ma ua amata loa ona oso le masalosalo o le tamaitiiti i galuega o lo o ala usu i ai lona tama, aua o fea ni galuega e amata i le isi pogisa ae uma mai fo’i ua pogisa, ona tonu ai lea i le manatu o le tama o Maui, ua tatau ona ia faia se 'auala se’i ona iloaina ai po o le a tonu le galuega a si ona tama o fai, aua o ni isi taimi e foliga mai e fai fa'aeteete lava gaoioiga a nai ona matua e pei o lo o i ai se tagata o lo o popole i ai ina ne’i iloa i la'ua.

Ua o'o i le isi taeao, ona ala po lava lea o le tama o Maui ua fa'atalitali le taimi e ala ai lona tama. E le’i umi se taimi ae va'aia loa e Maui lona tama ua ala mai i luga, ma ua sauni fo’i o le a alu i lana galuega, na ona ulufafo lava o le toeaina ma le fale, o le taimi fo’i lea na mulimuli atu ai loa ma Maui e aunoa ma se iloa e lona tama.

Na tau mulimuli fa'alilolilo atu pea Maui i lona tama, se'ia o'o atu i luma o le isi 'auvae mauga, ona va'aia ai loa lea e Maui o lona tama ua tupu, ae foliga mai o lo o musumusu i se isi tagata i gagana 'ese'ese, ma fa'afuase’i ai ona ia va'aia le 'auvae mauga ua matala mai, ona ulufale loa lea o lona tama i totonu, o le taimi fo’i lea na ulufale atu ai fa'alilolilo ma le tama o Maui i totonu o le ‘ana e aunoa ma se iloa e lona tama, ma o le taimi lava na la taunu'u ai i totonu, o le taimi lea na toe mapuni ai le ‘ana ma ua maofa Maui i le mata’utia o lenei lalolagi fou ua ulufale i ai,  ae ua iloa fo’i e lona tama o lea fo’i ua i totonu lona atali’i o le ‘ana, o lea na ia talosaga atu ai ia Maui ina ia toe fo’i ina ne’i iloa o ia e le Sau'ai, peita'i sa le popole i ai Maui.