Ads by Google Ads by Google

Vavau a Samoa

O AITU VAVALO A SAMOA

vaega #1

O le tama tonu lea o lo o ta'ua i tala tu'u a le atunu'u, sa fa'aigoaina o Mata’ulufotu. O se tasi aso, na sau ai se malaga mai Fiti e sa'ili fofo i Samoa mo le gasegase o le afafine o le Tui Fiti, ona taumafai lea o le ulugali'i e fa'aafe le malaga, peita'i e le i afe ae sa alu pea le va'a, peita'i, ina ua afatia le malaga i le ava o Puava, ona toe fo'i mai loa lea i uta o le malaga ma avatu le ulugali'i, ma latou malaga loa i Fiti.

A o le i tu'ua e le malaga Fiti, sa fai le mavaega a le Tui Fiti i le 'au malaga pe a toe fo'i atu, afai ae manuia la latou sa'iliga, ia ui atu i le ava o atule, ae afai ae le manuia, ia ui atu i le ava o anae, peita'i o le fa'afitauli ua tula'i mai, ua taunu'u le malaga, ae ua oti le afafine o le Tui Fiti ona o lona gasegase, ina ua taliga le sa'iliga fofo na alu i Samoa.

Sa fesili le Tui Fiti i le malaga pe na maua se fofo, ae tali atu le malaga, e i ai le ulugali'i na o latou o atu ma avatu, peita'i na fai atu le Tui Fiti, ua siliga se laveai ona o lea ua oti lona afafine, ae afai ae le toe ola, o lona uiga o le a mu le foaga i le ulugali'i. Ae manatua fo'i, o lo o malaga lava le ulugali'i ma 'ave le la tama o Mata'ulufotu lea o lo o i ai lona ulupo'o i totonu o le ato o le ola. Ua faia le fa'atonuga a le Tui Fiti ma ua 'ave nei le ulugali'i ua tu'u i totonu o le fale-'ofe, ona fa'atonuina lea e le tama o Mata'ulufotu ona matua, e alu ane le isi o i la'ua e nofo i vae o le afafine o le Tui Fiti, ae alu le isi e nofo i le ulu, ae se'i alu i le nofoaga o lo o teu ai agaga e su’e mai le agaga o le afafine o le Tui Fiti, ona alu loa lea o le tama.

Ua mae'a ona faia e le ulugali'i le fa'atonuga a le la tama, ina ia nofo le isi i ulu o le teine ae nofo le isi i vae o le teine, ma fa'atali atu ai lea i'ina, ae se'i alu e sa'ili mai le agaga o le teine, manu e le i mu le foaga e pei ona ta'ua e le Tui Fiti. Ua alu le tama o Mata’ulufotu e sa'ili mai le agaga o le afafine o le Tui Fiti, ona ia tau atu ai lea i le olomatua e igoa ia Pulotu, ona fa'aafe lea e le olomatua le sa'iliga agaga a le tama. A o taumafai le tama e fa'amatala i le olomatua le uiga o lana savali, sa fa'apea mai le olomatua, “aua e te popole, ua ou iloa le autu o lau savali, ae fa'apea, o le a ta tauva palo muamua, pe tauva matemate tupua, afai a e malo, e te alu ma le agaga o le teine, ae afai ou te malo, e te toe fo'i e leai se agaga e te alu ma oe, ona fai loa lea o le tauvaga palo a le tama ma le olomatua. Soifua