Ads by Google Ads by Google

Vavau a Samoa

O LE TALA I LE IETOGA O LE "PIPI'I MA LE 'ELE'ELE"

Toe soso'o ane lau faitau mai le vaega na gata mai ai la tatou polokalama i le vaiaso na te'a nei, lea fai mai le tala ina ua laga a'e i luga le ietoga ua pipi'i uma i ai palapala, ona maua ai loa lea i'ina o le igoa o le ietoga, o le "pipi'i ma le 'ele'ele". Ona fa'aauau loa lea o le malaga a le tama'ita'i o Anivaolepo ua fa'ata'alise atu i le malae i Lalomilo lea o lo o fa'atali mai ai ana tulafale na latou malaga mai, ma fa'ailoa i ai le tali o lana savali, ma latou toe malaga loa e aga'i atu i Amaile ma Anapapa. Fai mai le tala ina ua latalata atu le va'a, sa va'ai mamao atu le teine ma ia iloa atu ai lona tuagane, ona fa'apea lea o 'upu a le teine, "ta fia pa'i e i le vai o le tama."

Fai mai le tala, o le taimi lava na taunu'u ai le va'a a le tama'ita'i ma ana tulafale, na oso ai loa i lalo le teine e fa'alanu, ae ua galo nimo ia te ia ona tatala' ese le ie o lo o sulu i lona sulugatiti, ma fai mai o le taimi lava na toe alu a'e ai i luga le tama'ita'i, na ia va'aia ai palapala sa pipi'i i le tino o le ie ua to'ulu 'ese uma, ae ua i'ila mai talu ai ona ua leva ona tatao i le 'ele'ele, ona suia ai lea o le igoa o le ie i'ina o le 'matumaivai'.

Ua avatu le ie ma ua fofola ona fa'apea lea o Tau'ili'ili i faletama e fia a Tuiatua ma le Tagaloa, ua lava le ie lea e si'i ai i latou i le maliu o lo latou tama, ma o i'ina na toe suia ai le igoa o le ie o le 'tasiaeafe'. E umi le tala i le malaga a le ie, ae fai mai le tala, o Tauaolosi'i na faufautane ia Fua'autoto'a, ona fa'ae'e lea o le gafa o le teine o Futa lea sa afifi i le ie, ae e i ai fo'i le ie na lalaga fa'apitoa mo Futa, ma e fua lava i le teineitiiti aua e laitiiti. Fai mai o le isi aso, sa fa'amoe ai Futa i luga o le fuefue, ae alu le lama a lona tina o Tauaolosi'i ma ona soa o Fua'autoto'a, o Leagogia ma Leatoia, ae o le mea ua tupu, ua o mai tagata Toga ua pu'e le lama, ma pu'e atu ai le olomatua fa'apea ai ma le teineitiiti sa moe i luga o le fuefue ma 'ave i Toga.

Fai mai o le ie la lea e sulu nei e tagata Toga, o le tauvala, o le laufala tonu lea a Futa, ae o le ietoga na avatu i'inei i Samoa. Fai mai le tala ina ua taunu'u le teineitiiti o Futa i Toga, ona toso lea e Lautivunia le teine, peita'i na ita tele ai le Tuitoga, ona manatu ai lea o le Tuitoga ua tatau ona fasioti Lautivunia ona o lana mea ua fai. Ua atili ona ita le Tuitoga ia Lautivunia ona a alu atu i ai fe'au e le alu ane, ae ua iloa lelei e le tama'ita'i ua le toe alofia le oti ma ia, ona ia fa'atonu ai lea o Leatoia ma Leagogia ina ia 'eli se lua tele i le va o 'alia ma ia fa'atutu ai ni tao. A la'ua va'ai atu i le afiafi o lo o u mai lona tua ma sau, ona fa'au lea i luga o mata o tao, ae a va'ai atu o lo o fa'asaga mai ona foliga i luma, ona 'ave'ese lea o mata o tao. Tuli tatao mai i le vaiaso fou i le taunu'uga o le tama'ita'i o Lautivunia.

Soifua.