Ads by Google Ads by Google

Vavau a Samoa

O le tala ia Sina ma Afia

 

Alo maia le mamalu o le aufaitau, o le toe faaauauina lenei o le tatou Vavau i le Auomanu ma le Aumala.

 

Fai mai ua ui atu le tama o Alae i le atu Aleipata, ma oo atu ai lana savaliga i Ulutogia, ma e taunuu atu, o loo tauai mai e tagata le fua o le ulu, ma fai mai le tala, o le ‘ulu lenei e na o manaia lava latou te tauai ina, ma o le manaia lava e pau ai le fua o le ‘ulu e faaipoipo ma le tama’ita’i o Semalamailagi, ma e ono aso e tauai ai le ‘ulu, ae na o po lava e tauai ai, ma o manaia uma lava sa auai i le tauaiina o le ‘ulu, sa nonofo uma i Salea’aumua i le mea e igoa o Falepogi.

 

Fai mai le mau a le atunuu, e le’i toe faatali le tama o Alae i le taimi lea, ae ua tago atu nei i lana pa ma lia’i i le ‘ulu, ma na tete’i tagata i le pau i lalo o le ‘ulu, ina ua alu atu le pa tau tonu lava i le ma’ave’ave o loo pipi’i ai le ‘ulu ma pau ai loa i lalo, ma o iina na maua ai loa se tasi o muagagana a le atunuu e faapea, “ua togi le pa tau i le ‘ave,” ona toe faaauau loa lea o le malaga a le tama o Alae ma lana pa.

 

Fai mai le tala, ua oo i le isi aso, ona oso a’e ai lea o se lagona i le tamaitai o Sina, o le a alu e saili Alae e toe aumai le pa a si ana tama o Taotunu na alu ma ia, ma o le mea lena na tupu, ua alu le sailiga a le tamaitai o Sina, ma o se sailiga fita ma le faigata sa i ai i le tau sailiina lea o Alae, ma o se taimi umi na toesea ai Sina mai le latou aiga ma Afia lona to’alua faapea ai Taotunu, ma ua fiu si toeaina o Afia e faatali le tamaitai, ui o lea, na toe fo’i mai Sina ma ina ua feiloa’i ma Afia, sa faapea atu Afia ia Sina, “fa ita lava o le a e faagalo mai a’u,” tali Sina, “e le mafai ona galo Afia isi ona vao.”

 

O Laulu, o le tagata lenei fai mai le mau a le atunuu na fafauina le pa lea sa ia Taotunu. Fai mai le tala, sa i ai se fagafao a le tagata lenei o Laulu, o le manu lenei o le Tava’e ma sa fafaga lava i totonu o lana fagaga, o ia fo’i o se tagata e fiafia e fagota. Fai mai o taimi uma lava e lele ai le Tava’e a Laulu, e tau mulimuli atu ai lava ma le tagata lenei.

 

Ua oo i le isi aso, ua alu atu Laulu e fafaga lana Tava’e, peitai e alu atu o loo i ai ivi i’a i le mea o loo tu tu ai le Tava’e, ma ua faaletonu ai le mafaufau o Laulu, pe faapefea ona oo atu nei ivi i’a i uta i le vaomatua o loo la i ai ma lana Tava’e fagafao, ma o le mea ua tupu, ua amata lava ona tele ivi i’a i totonu o le fagaga lea o loo i ai le Tava’e ona ia manatu loa lea i se aso, o le a ia taumafai e saili le pogai e ala ai ona oo atu i uta i le vao ivi i’a nei. Tuli tatao mai i le vaiaso fou le vaega mulimuli o le tatou Vavau lea, ma se’i manino ai ia Laulu le mafuaaga na ala ai ona o’o atu i uta ivi i’a nei ua tau i ai lana vaai. Soifua.