Ads by Google Ads by Google

VAVAU A SAMOA

O LE FALE NAI AMOA E LAU I ULA AE POU I TOA

 

O le tala lenei o lo’o taua ai le upu e fa’apea, “O le fale nai Amoa e lau i ula ae pou i toa”, na mafua mai ona o le tala e fa’atatau i le tama’ita’i tagivale o Meto ma le tama o Alo, le tama lea na maua ina ua usu le tama’ita’i o Sinalefatumoa ia Naisaafa le ali’i o Amoa.

 

I le aga’i i uta i le nu’u o Asaga i le motu o Savai’i, o lo’o tu ai le ana e fa’aigoa o le ‘ana o le Imoa, ma, fai mai le talatu’u a Samoa i aso anamua, o le vaega tonu o lo’o i ai lenei ‘ana, sa igoa muamua i le igoa o Naisaafa, ma o le igoa lea o le tupu o Amoa sa i ai i na ona taimi. Fai mai le tala, e na o le tatasi lava le tama a le tama’ita’i o Sinalefatumoa, e na o le tama o Alo, ma o Alo la lea na alu i le tasi e aso e utu mai ni suasami mo lona aiga, ae tau atu ai i le nu’u o Pu’apu’a, o fai mai ai le ta’aloga o le ‘tauga moa’. O le ta’aloga lenei, e o tagata aumai a latou moa (toa) e lua, ona latou fetagofi lea ua fa’atau po’o ai e manumalo.

 

Na avea le naunau o le tamaititi o Alo i lona fia auai i le fa’atauga moa lea o lo’o fai mai ma itu na toe foi ai loa i lo latou fale, ma tauanau lona tina e su’e mai sana moa se’i alu e ta’alo ai i le ta’aloga o lo’o faia i Pu’apu’a, peita’i, sa le’i fiafia i ai lona tina, ma i’u ina alu atu ai lona tina ua avatu i ai le manu lenei o le Ti’otala, ona alu fiafia loa lea o le tama o Alo i tai i le mea o lo’o fai ai le tauga moa. Fai mai le tala, e leai ma se moa na sao i le Ti’otala a Alo, aua so’o se taimi lava e tau ai le Ti’otala ma le moa, e ta togi uma ai e le Ti’otala mata o moa ma i’u ai lava ina mate, ma ua le toe faia ai loa e tagata o le nu’u lea ta’aloga, ae ua sui le latou ta’aloga i le ta’aloga o le taga ti’a.

 

Fai mai ua vevela taaloga taga ti’a i totonu o Pu’apu’a ma ua alu atu ai ma le tama o Alo talu ai o lona fia vaai i lona tama. Fai mai ua oo i le isi aso, ona fai atu lea o le tamaitai o Sinalefatumoa i lana tama o Alo, afai ae i ai se aso e alu ai e saili lona tama, o le tagata lava e tau atu i ai o nofonofo mai i luga o le ogalaau, o lona tama lena. Sa le ano tele i ai Alo i le taimi, ona o lea ua pisi le taaloga taga ti’a, ma o le faiga o le taaloga, o le tamaititi o Alo e ta ti’a, ae o lona tina e alu e su’e mai. Fai mai le mau a Samoa, ua oo i le isi aso, ua vevela ai lava taga ti’a, ona ta mai ai loa lea e Alo lana ti’a mai le vaega eleele e taua o Papalaulelei, ma alu atu sa’o lava le ti’a ua ulu i totonu o le ‘ana o Meto i Pu’apu’a, ma o le ti’a lea na mafua ai ona maua se tasi o upu a Samoa e faapea, “o le ti’a ulutonu” e faamanatu ai le taimi na ta ai e Alo lana ti’a ma ulu i totonu o le ‘ana a le tama’ita’i o Meto.