Ads by Google Ads by Google

Vavau a Samoa

Aiga Tautai i Puleia

O le toai taunuu o le igaga o totonu o le nuu, e faia ai le mea e taua o le ‘tapuaiga’, aua o le taimi lea e o mai faatasi ai tamalii ma failauga o le nuu, faapea ai le aumaga mo le tapuaiga, latou te faatali faapitoa le toai taunuu mai i le igaga i uta, ma o le a matua tausisia tu ma aga e masani ai i le taimi e faatali ai le taunuu mai o le igaga, aua o le a i ai le Aiga Tautai poo le tautai ulu lea e faasino ia Ili ma Tagoai, ma o le a tatau foi i lea aso ona i ai se mea e taua o le ‘Tu’, poo se taumafa lea ua maea ona faavela i se suavai e pei o se puaa poo se isi lava foi taumafa taua e saunia mo lea aso.

Ma, e i ai foi tulafono o le aso, afai se suavai ae tutu le suavai, e na o le faatasi lava ona tutu le afi mo le faapusaina o le suava, ma, a solo maa o le suavai e le mafai ona toe fetui i luga o le umu, o valusaga, pa’u fa’i poo pa’u taamu, o le a fu’e uma i totonu o se ato e tuu faatasi uma ai.

Afai o le a laulau le taumafataga i le aso, ia fua le aofai o laulau e folafola i le aofai o le Aiga Tautai o le a i ai i lea aso, ma e le tatau ona sili se laulau, afai foi o loo faaaogaina ni mailo, e le tatau ona sili mailo e lalaga i le aofai o le Aiga Tautai, ma e tatau foi ona taumamafa faatasi tagata uma i le taimi lava e tasi, ma o mea uma e totoe mai le taligasua, o le a lafoa’i uma i le sami ai ma pa’u fa’i faapea ai le valusaga ma pa’u taamu sa fu’e i totonu o le ato.

O le tapu i le taimi e a’e mai ai le igaga, o le taimi lea o le a tulai ai loa Ili ma Tagoai ma agai mai loa i fafo ma le fale, ma afai la te silasila atu i le na o le fotua’i mai o le igaga ma toe mou atu, o lona uiga, atonu o loo i ai se vaega faaleaganuu o le tapenaga e le’i faia, pe faapea foi, atonu toe lava o le ‘Tu’ e lei faia mo le tapenaga ae ua maea ona faia mea uma e tusa ai o le aganuu ma le tapenaga, ma o le mea moni, o sina faaletonu laititi lava i le faatinoina o le aganuu aua le faataliina o le taunuu mai o le i’a e ono avea ma itu e toe teva ese atu ai le igaga ma le toe iloa atu ai.

Ma o le taimi la e fagotaina ai le igaga, e faaaogaina i ai le mea e pei o se faamataupega e tai foliga lava o se mea ta palolo, ma o le igoa o le mataupega lea e faaigoaina o le ‘Fonoti’, ma e gaosi mai i le afa matuatua, ma e tai foliga o se taga ona foliga, e le pupuniina le pito i luma ae pupuni na o le pito i tua e agai atu e tau i luga o le vaega o loo uu e le lima o le tautai, ma e lua ona au e faaaogaina, e faagaioi ina ia faa faigofie ai ona matala ma mafai ai ona ulu i totonu o le igaga pe a oo ina fagotaina.