MAVAEGA A FULUULALEFANUA I LONA TUAFAFINE

Ia, sosoo ane loa lau silasila ma lau faitau i le vaega mulimuli lenei o le tatou polokalame o Vavau Samoa, lea na faamuta mai i le vaega lua i le vaiaso na te'a nei, ina ua faailoa e le ali'i o Vave mea uma sa faia e tagata o le nu'u o Iva ia te ia, aemaise ai o le mea na oo i tagata o le nu'u.

Fai mai e taunuu tama i le po, ua momoe uma le malaga a Iva, ae tasi lava le pola o le faleoo o loo sisi i luga, ona o atu loa lea o tama ma a la seu lupe ua seu uma ai agaga o tagata Iva ae tuu ai na o le agaga o le olomatua na alofa atu ma avatu le meaai ona toe o loa lea, ma o iina lea e mafua ai le sa a Iva, e sa ona toe sisi i luga se pola se tasi o le fale, ae ia tutuu uma i lalo.

Ua oo le seuga a Vave ma Sealiitumatafaga i Satupaitea ma o iina na tagi ai le tama o Salevao ma ua le mafai ona toe faana, ona afe loa lea o le tama i eleele o Saua ma Samana, ona sau ai loa lea o le teine e igoa ia Tumupu’e, o le afafine o le toeaina o Valomua ua siva ina ia taumafai e faana ai le tama ua tagi tele.

Ao siva Tumupu’e, na vaai atu le tamaititi, pei lava le teine o loo siva o lona tina, ona uma ai loa lea o le tagi a le tamaititi ae ua na, ona o atu loa lea o tama ua ave le tama ua faapau lona pute ae sama e Salemuliaga aua o le tina o le tamaititi o le Salemuliaga ae o le taimi lea o loo mulimuli atu ai lava le aitu o Uliamoa, o ia tonu lea na susunuina le fale lea na i ai le tamaititi i totonu.

Fai mai ona faasaga atu loa lea o Vave ua fasioti le aitu o Uliamoa ma ave ese lona ulu, ona taavalevale lea o le atigipoo o Uliamoa, fai mai ao taavale mai le atiipoo o Uliamoa, sa vaaia le toto uma o le atigipoo, fai mai ona siva loa lea o le tamaititi o Salevao ae taavavale ulupoo, pati lima laau o le vao ae tata faalii ai ina ua na Salevao.

Ma o iina lea na maua ai taeao faitauina o Samoa e taua o le taeao nai Saua ma le taeao nai Samana. O le faaiuga fo'i lena o lenei vaega o le tatou polokalame o Vavau o Samoa, faamoemoe o le a tatou toe feiloa'i fo'i i le vaiaso fou i luga o le tatou polokalame lava lenei, mo le tu'uina atu lea o nisi vaega o Vavau a Samoa. Soifua.