Ads by Google Ads by Google

Vavau a Samoa

O LE TALA IA VAEA

E anoanoa’i muagagana faasamoa aemaise ai o alagaupu na mafai ona maua mai ona o le tala ia Vaea ma Apaula faapea ai le tama o Vaatausili. I totonu o Tufutafoe, o loo i ai le Ana e faaigoaina o le Ana o Vaatausili, ma le paepae maa e faaigoaina o le Paepae a Apaula, e faapea le tala, o iina na tagi ai le tamaitai o Apaula ina ua vaai atu i le tino o Vaatausili le uso o lona toalua o Vaea, e le taitai talafeagai ma lona manaoga o loo i ai, o le fia faasaoina lea o le ola o si ana tama lea o le a fasiotia e ona tuagane i Fiti.

O le talatuu ma le mau a tagata Tufutafoe e faapea, o Apaula, o le tamaitai Fiti ae sa nonofo ma le tagata e igoa ia Vaea. Na malaga Apaula e asiasi i lona aiga i Fiti, ao ma’itaga i lana tama ulumatua. Fai mai ao alu le vaa lea o loo malaga ai Apaula i Fiti, sa ia iloa mai lona toalua o Vaea, o loo tu tu atu pea i le vaega e taua o Savalalo i Apia, o loo talotalo atu lona lima ia te ia, ma ina ua fanau lana tama, ona ia faaigoaina lea ia Tu-i-savalalo, e faamanatu ai le taimi lea na tu mai ai Vaea i Savalalo ma talotalo mai lona lima ia te ia.

Ua tupu tupu ae le tamaititi o Tuisavalalo i Fiti i le aiga o lona tina, ma sa itagia o ia e tuagane o lona tina, ona o ia o le Samoa ma o lana amio foi e le fefe i se tagata Fiti, e oo lava i tagata o le aiga o lona tina fai mai e fasi e le tama o Tuisavalalo, ma iu ina pu’e ai e tuagane o Apaula le tama o le a fai ai la latou alofisa i se tasi aso, ona sola mai ai loa lea o Apaula e tau mai ia Vaea i Samoa, le tala faanoanoa ua oo i lona atalii, peitai fai mai le tala, e taunuu mai Apaula, ua toeititi lava uma le tino o Vaea ona liu mauga, ma ua le toe mafai foi e Vaea ona toe fai se isi gaioiga e fesoasoani atu ai ia te ia, ma fai mai le mau a Samoa, o iina lea na mafua ai le upu faamuagagana e faapea, “ua taunuu mai Apaula ua tautua.”

O lona uiga, ua taunuu mai Apaula ua tuai, ua leai se aoga ona ua liu mauga Vaea. Sa faailoa e Apaula ia Vaea tulaga uma o lona sola ese mai i Fiti, faapea ai ma le agaleagaina o ia e ona tuagane faapea ai ma le taumafai o ona tuagane e fasioti lona atalii, ona ita ai lea o Vaea ona o le alofa i lona atalii, peitai ua faigata ia te ia ona toe fai se isi gaioiga e tali atu ai i le mafatia o Apaula.

Sa faapea atu loa Vaea ia Apaula, “Sau ina e alu i Savaii, e te maua i ai lo’u uso o Vaatausili, o ia lena o le tali i ou mafatiaga.” Sa fai atu Vaea, “Afai e te taunuu i Savaii, ona e agai lea i le nuu o Amoa i le Faasaleleaga, e te maua ai se tamaititi o ta pepe ai i le ala, ona e fesili lea i ai poo fea e te maua i ai Vaatausili, ona e alu lea i ai e faailoa i ai tulaga uma o lou oo mai, o le ia fesoasoani foi ia te oe.”. Tuli tatao mai le vaega lua o le tatou polokalame lenei i le vaiaso fou. Soifua