Ads by Google Ads by Google

VAVAU A SAMOA

MAVAEGA A FULUULALEFANUA I LONA TUAFAFINE

Toe soso’o ane loa lau silasila i le vaega lua lenei o le tatou tala i Vavau a Samoa lea sa auina atu i le vaiaso na te’a nei.

Fai mai le tala ona tagi ai lea o le teine o Sinavaiana ma faapea ana upu, “A i ai se aitu o le atu Samoa o ona iloaina mai lenei puapuaga, sei sau e lavea’i isi au tama o lea ua agaleagaina o ia.” Peitai fai mai le tala, ua atili ai ona sasao i luga le afi ma ua utu, pe ua malamalama uma atu ai ma le nuu o Lano, ona mafua ai loa lea ona maua le igoa o “Utumalama” lea o loo faaigoa ai le ava i Lano o Utumalama. Fai mai ao tagi aue le teine o Sinavaiana, o le taimi lea o loo seu lupe ai aitu o Samoa, o Vave ma Sealiitumatafaga ma sa laua lagonaina atu le tagi a le tama’ita’i, aua fo’i o tagata Samoa i aso anamua sa itu lua tagata, o le itu tagata ma le itu sauali’i, ona tuu loa lea o le la seuga lupe, ae ua la o mai ua susu’e i luga le pito o le fale ae se’i atu i fafo le tama ma la o loa ma ave.

Sa tago le aitu o Vave ua tuu le tama i totonu o lana ato seu ona toe faaauau lea o le la seuga, ma o iina lea e mafua ai ona maua le upu, “Ua ifo le Naaloa e pei o le seuga nai Amoa.”, ona o lea sa tuu le seuga a alii nei ae aga’i atu e lavea’i le tama a le tama’ita’i o Sinavaiana

Fai mai le mau a Samoa, e le’i i ai lava se taimi na toe tuu e Vave ma Sealiitumataga ina ua la faalogoina le tagi aueue mai o le tamaitai o Sinavaiana ona o le alofa isi ana tama, ae ua la o mai lava ma ua faasao le ola o le pepe, ma ua tuu loa i totonu o le ato seu, ona toe faaauau lea o le laua seuga seia oo ina vaaia e Vave lupe o le vaveao ona ia faapea atu loa lea ia Sealiitumatafaga, ua tatau ona le seu ona o lea ua o la vaaia lupe o le vaveao, ma o lupe ia e masani ona faaigoaina e toeaiina i aso ua mavae o lupe pupula, ona o le mananaia o le papa’e o latou fulu, peitai sa faapea atu Sealiitumatafaga ia Vave, “A e seu, aua ete seu tafilia le gaa, leaga e le oge lavelave le vao, a ia seu matatoaga le lupe a Salevao.” Tuli tatao mai i le vaiaso fou le vaega tonu o le tatou Vavau a Samoa. Soifua