Ads by Google Ads by Google

Vavau a Samoa

O LE MAFUAAGA O LE IGOA O SINATAPUITEA

 

Manatua foi, na gata mai la tatou Vavau mai le vaiaso na tea nei, i le taimi lea ua nonofo ai le tagata lenei o Tapu ma le teine o Sina, ma ua fanau foi le la tama ua faaigoa foi ia Sina, ma le faanaunauga o le ulugalii, e tatau lava ona i ai se igoa moni o le teine e ese mai ia Sina. Fai mai o le masina a le tagata lenei o Tapu, ua faaauau pea ona alu ana faiva i le Fafa o Saualii e tausi ai lona toalua ma lona afafine, aemaise ai o matua o lona toalua aua o le ulugalii e tauaso, ma ua agai atu ina tele aso ma tausaga, e lei toe oo lava le tama o Tapu e asi lona aiga i Falealupo.

 

I se tasi aso, ua tonu ai i le mafaufau o Tapu, ua tatau ona tapena lana malaga e alu e asi lona aiga, peitai o le faigata e tatau foi ona o faatasi ma Sina lona toalua, faatasi ai ma Sina lona afafine, ona faatulaga loa le aso e faamoemoe latou te malaga ai i Falealupo. E pei ona silafia e le mamalu o le aufaitau, o Falealupo e le mamao ma Neiafu ma o aso ua mavae, sa tele ina sopo tagata, pe savavali foi mai isi nuu i isi nuu, ma o le tulaga lena ua fuafua i ai Tapu latou te malaga ai ma lona aiga, o le a latou sopo atu i le vaomatua, ina ia taunuu i lo latou nuu. Fai mai ua oo i le aso ua faatulaga ai le malaga a Tapu ma Sina ma Sina, ona latou o loa lea. Ao alu le malaga a Tapu ma Sina, na toe manatua e Tapu e lei maua se igoa o le teine e ese mai ia Sina lea e faaigoa ai, ona fai atu lea o Tapu ia Sina lona toalua, e tatau ona toe foi i ona matua sei aumai se igoa o le teine ona toe faaauau ai lea o le matou malaga i lona aiga aua e tatau ona oo atu i lona aiga ua i ai se igoa o le teine.

 

Ua toe foi Tapu ma Sina ma le teine ia Ui ma Tea sei aumai se igoa o le teine ona toe faaauau ai lea o le latou malaga. Ona fai atu lea o Tapu ia Ui ma Tea, ua matou toe foi mai se fai se igoa o le teine ona matou toe o ai loa lea e asiasi i lo’u aiga. Ona faapea mai lea o Ui ma Tea, ua lelei, e sili ona fai le tonu, ia aofia uma o tatou igoa i le igoa o le teine, ae faamuamua lua igoa ona mulimuli atu ai lea o ma igoa, ona maua ai loa lea o le teine o SINA-TAPU-UI-TEA. O le igoa atoa o le teine o Sinatapuitea. Soifua.