O LE TALA I LE ULUGALII O UI MA TEA

E ui e lasi talitonuga a Samoa e fa’atatau i ana tala tu’u, ae i ai le talitonuga ua nofofale i loto ma finagalo le taua o tala anamua, lea o lo’o avea pea o se toe fafagu i tupulaga i aso nei, i le taua o le auala na mafua ai ona maua igoa ma mafua nisi o tala tupu a le atunu’u.

O le tala lenei, e foliga mai e itulua tagata Samoa i ona po ua mavae ona e le mafai ona talitonuina se tulaga faapea e oo i ni tagata tauaso pe o ni tagata fo’i e po le vaai, ae o e fagogota, peitai o le mea lena o loo tupu i le talatuu lenei, ma ua avea ai o se tasi o vavau iloga a Samoa i le taimi nei. Fai mai le mau a Salafai, o le ulugalii o Ui ma lona toalua o Tea, e tauaso uma i laua, pe po le la vaai, ma e le mafai ona la vaaia ni mea, sa nonofo i gauta o Neiafu i le eleele e igoa o Fatu Saaga ma le la tama teine e toatasi, le teine o Sina.

O se mea malie sa tupu i taimi uma e alu ai le faiva a le ulugalii tauaso lenei, aua e masani ona tuu le la tama teine e toatasi o Sina i luga o le fuefue ao fai le la faiva ma o le mea la e tupu, o taimi uma lava e fagogota ai le ulugalii tauaso lenei, e alu ane ai le tagata e igoa ia Tapu, o se tagata mai Falealupo ua tausi le teine ma fafaga faalelei. O le ulugalii lenei, e masani lava ona fagogota i le Fafa o Saualii, aua o se vaega e tele ai le i’a. O le tagata lenei o Tapu, e masani ona fagota i le mea lea e fagogota ai le ulugalii, ma, o le mafuaaga lena na te iloaina ai le mea o loo tupu Fai mai i se tasi po ina ua a’e mai le faiva a le ulugalii, na o mai loa ua faafuata le teine o Sina ma latou o loa, ae o le taimi lea ua mulimuli atu ai i tua ma le tagata lenei o Tapu.

Ua alu pea le savaliga a le ulugalii ma ua oo i le nofoaga e taua o Fatu Saaga, ona sasaa lea i lalo o i’a o loo i le ola ma matamata i ai, ona toe faaauau ai lea o le la savaliga, ae ina ua taunuu atu i le laueleele ua faaigoaina o “Malagia,” o iina na faatoa malagia pe ua iloa ai e le ulugalii, o loo i ai le tagata o loo mulimuli atu ia te i latou, ma ua amata ai loa iina ma le mafutaga a le ulugalii ma le tagata lenei o Tapu.  Fai mai le tala ua nonofo pea Ui ma Tea ma le tagata lenei o Tapu i lo latou aiga, ua oo foi ina matua le teine o Sina, ona nonofo loa lea ma Tapu, ma ua fanau le la tama ulumatua, ua faaigoa foi ia Sina, ona e lei maua se igoa o le teine i lea taimi, ae o le mea ua tupu, talu mai lava le aso na mafuta ai Tapu ma le ulugalii tauaso lea lava ua i’u ina nonofo ma le teine o Sina, e lei toe alu lava e asi lona aiga i Falealupo, ma, o le vaiaso fou, o le a faailoa atu ai le taimi na fuafua ai Tapu o le a alu e asi lona aiga ma le mea na tupu ai.