Ads by Google Ads by Google

Vavau a Samoa

O LE POGAI NA IFO AI LE ASO O LE MALIETOA

Ua mae'a le 'ava, ona faai'u lea i le matematega a Malietoa ma Puleleiite, ma fai mai le tala na mae'a uma palo a Malietoa ona mate e Puleleiite, ona faapea atu lea o Puleleiite ina o le a toe fo'i i Savai'i ia Malietoa, "a e susu atu i Salafai, alu atu ma avatu se tula o la'u lupe."

Sa finagalo malie i ai le ali'i, ona malaga lea i le isi aso i Savai'i ma ave laau, ae fai ane i ai Puleleiite, "o lou finagalo ea e oge laau Salafai nei.?" peitai fai mai le mau faa Tuisamau ma Auimatagi, sa fai Puleleiite ia Malietoa i le taimi o le la matematega a susu atu i Savai'i, ona alu atu lea ma avatu se ama o lona va'a, lea fai i ai Puleleiite, pe o lona finagalo e oge laau Salafai.

Fai mai le mau a le atunuu, o Puleleiite lenei sa nonofo ma le tagata e igoa ia 'Ae e tautua Leali'ifano ma Tigilau i Falelatai. Ua oo i le isi aso, ona fai atu lea o 'Ae ia Leali'ifano, se'i alu i lona aiga i Toga, ae aumai ana i'a e lua se'i malaga ai, ona malie lea o Leali'ifano ona fai ai lea o le la tuugatala, a taunuu 'Ae i Toga, ona toe tutuli mai lea o ana i'a, peitai ua le osi feagaiga 'Ae, ua taunuu i Toga, ona ia fasi mate ina lea o le isi i'a, ae sola mai le isi i'a ua mate i le va o Tutuila ma Manu'a. Fai mai le mau e fo'i atu le malaga a Puleleiite i Savai'i, ae faae'e loa le faiva a le Aiga Sa Sa'umani, ona oso ai loa lea o Puleleiite i luga o le va'a, peitai sa fesili ai tama, "sole, o ai oe a'o ai lou igoa,?" e le'i tali Puleleiite ae sa ia toe fesili i tama i le fesili lava lea, "o ai outou a'o ai fo'i o outou igoa,?" ua tali tama, "o Sa Sa'umani," ona faapea atu lea o Puleleiite, "ua lelei, Sa'umani Oe, Sa'umani Oe, ae Saumani Afaese a'u." O iina lea fai mai le mau na suia ai le igoa o Puleleiite ia Sa'umani Afaese.

Fai mai ona alu loa lea o le faiva, ma ua taumafai e tuli le i'a, ona maua lea o le i'a, ma ua tofi Sa'umani Afaese poo le tama o Puleleiite e si'i a'e i luga, ona naunau atu lava lea o le Aiga Sa Sa'umani e toso mai i luga le i'a, peitai sa tali Sa'umani Afaese, "e alu pea le va'a faitalia o ia ma ta'ita'i alalo atu le i'a," fai mai le mau o iinei na maua ai le upu, "ua ta'ialalo le i'a a le Aiga Sa Sa'umani." Fai mia le tala ua aumai le i'a i Samoa, ae ua malaga Sa'umani Afaese i Toga, ma fai ia Tuitoga Fakapouli, afai o i ai ni toega o le i'a o totoe, ona aumai lea e alu ma ia i Samoa, peitai sa talosaga ane fo'i le Tuitoga ia Puleleiite, tautuana ma ia e tapu'e ane ni moa ma ia ona e leai ni moa i Toga, peitai sa fai atu fo'i Puleleiite, a alu atu la i Samoa, tautuana ni ana niu e alu atu ma ia. O le a faaauau atu i le vaiaso fou le soso'oina o le tatou polokalame lenei i le feiloaiga a Tuitoga ma Puleleiite, ae maise ai o le iuga na oo i ai le tagata le alofa o 'Ae. Faafetai.