E silia i le $3 miliona lea ua valoia e le Teutupe a le malo e ono nofo aitalafu ai le malo o Amerika Samoa, pe a oo atu i le faaiuga o le Tausaga Tupe lenei 2013, e pei ona taua e Falema’o ‘Phil’ M Pili i sana tusi sa tuuina atu i le alii kovana sili faatasi ai ma le ripoti o le Kuata Lona Lua o le tausaga tupe lenei 2013.

Na taua e Falema’o i lana tusi ia Lolo Matalasi Moliga i le aso 29 Aperila, 2013 e faapea, e $1.2 miliona o lo o taua i le ripoti e ono nofo aitalafu ai le malo i le Teugatupe Lotoifale mo le kuata lona lua o le tausaga faaletupe lenei, e mafua lea tulaga ona o le teuga tupe lotoifale lea sa faaaoga e faatumu ai ni isi o polokalama faapitoa ua ova la latou faaaoga i tupe sa tuuina atu i ai.

Ae ui i tulaga o le nofo aitalafu ai o le malo i tupe lotoifale, o se tala fiafia mo le malo e pei ona taua i lea ripoti, e silia i le $7 miliona e maualuga ai tupe e ao e le malo mai tupe sa fuafua e tatau ona maua.

E $4.2 miliona o le a maua mai i lafoga o oloa nai lo tupe sa fuafua e maua, ae $30,522 o le a maualalo ai tupe e maua mai i Pemita ma Laisene nai lo tupe sa fuafua e maua.

E $104,038 o le a maua mai i Sala ma Tupe totogi nai lo tupe na fuafua e maua, e faapena foi i tupe o Tautua ma tupe totogi, e $430,186 o le a maua mai nai lo tupe na fuafua e maua.

E $1.27 miliona o le a maua mai tupe e ao mai i isi tupe maua a le malo nai lo tupe sa faamoemoe e maua, ma le $1.3 miliona o le a maua mai i Polokalama Faapitoa ma Tupe Feterale nai lo tupe sa faamoemoe e maua mai.

I tupe faaaoga a le malo, o lo o taua ai i le ripoti le oo atu i le $8.4 miliona ua ova ai tupe ua faaaoga e matagaluega ma ofisa a le malo nai lo tupe sa faapaketi mo le kuata lona lua o le tausaga tupe lenei.

E 10 Matagaluega ma Ofisa a le malo ma Polokalame faapitoa e 7 o lo o taua i le ripoti e ono ova la latou faaaoga mo tupe sa paketi mo le kuata lua, ma o ia matagaluega a le malo e aofia ai le Ofisa o le Kovana, Fono Faitulafono, Ofisa Tupe, Ofisa Aoga, Soifua Maloloina, Pulega Uafu ma Taulaga, Ofisa o Galuega, Ofisa o Leoleo ma le Ofisa o Palota.

O Polokalama e ono ova la latou faaaoga mai tupe sa paketi e aofia ai Ofisa e le o ni matagaluega a le malo, lea e $287,000 le aofa’i o le tupe ua latou faaaogaina; $436,828 sa totogi atu e faaaoga ai tupe na fai ai totogi faai’u o Faatonusili ma Tagata Faigaluega Konekarate i le nofoaiga ua mavae atu, $490,000 sa totogi mo le Inisiua, $111,762 mo le Ofisa Faaleleia Tamaoaiga malo, $267,374 mo le Veteran Memorial, $260,688 na totogi mo le pili vai ma le uila mo ofisa e le o i totonu o le EOB, ma le $191,849 na faaalu mo le faaleleia o vaega o le maota a le malo i Utulei, le EOB.

I le fonotaga a le kapeneta na faatoa mae’a atu nei, na manino ai i le saunoaga a le Teutupe a le malo tulaga lelei o ana tupe ao e pei ona vaaia i le taimi nei, e le gata i lafoga mo oloa mai fafo, ae faapea foi i isi tupe maua a le malo mai lisi ma aitalafu mai tausaga ua mavae.

O lea ua agai atu i le ono masina talu ona tula’i mai le faigamalo a Lolo ma Lemanu mo le taitaiina o le malo, ma o lo o laa pea i luma le faigamalo i tulaga o tupe maua mai faalotoifale e pei ona saunoa le teutupe.

O le agaga atoa o le malo e pei ona faalauiloa e ona ta’ita’i, o le taumafai lea e faatosina mai pisinisi mai fafo atoa ai ma le faavaeina o ni pisinisi lotoifale, ina ia maua ai ni isi galuega fou mo le atunuu i le lumana’i.