Valoia Lolo le paleni le Paketi mo le tausaga tupe 2013

I se tusi na tuuina atu e le alii kovana ia Lolo Matalasi Moliga i taitai o le fono i le vaiaso nei ina ua ia tuuina atu le pili e toe faapolokalame ai e le fono le $4.38 miliona o lo o totoe mai i le tausaga tupe 2014, na taua ai e Lolo le paleni o le tausaga tupe lenei a le malo mo le taimi muamua.

 

I le tapunia aloaia ai o le tauaofiaga lona lua o le nofoaiga 33 a le Fono Faitulafono i le taeao ananafi, na folafola ai loa e ta’ita’i a maota e lua le tatala aloaia o le Fono Faapitoa sa valaauina e le alii kovana i le taeao nei.

 

I se tusi a Lolo na tuuina atu i taitai o le fono, sa ia taua ai i le tele o tausaga ua tuana’i atu, e foliga mai ai sa faatuatuana’i e nofoaiga ua mavae atu a le malo ma le Fono Faitulafono, le Vaega 06, o le Ulutala 10 o le Tulafono a Amerika Samoa.

 

Na taua e le alii kovana e faapea, e i ai lona talitonuga e le tatau ona toe faaauauina lenei faiga sa fai mai i tausaga ua mavae, ona o le isi lea tautinoga a le faigamalo ua tulai mai nei, o le usitaia lea o tulafono uma mo tagatanuu ma le teritori o Amerika Samoa.

 

“O le Ulutala 10, o le Vaega 06 o le Tulafono a Amerika Samoa, o lo o faatapula’a mai ai tupe e tatau i le malo ona faaaoga mai tupe sa pasia mai e le Fono,” o se vaega lea o le tusi a Lolo. “I nai tausaga ua mamao atu, i le taimi e latalata atu ai i le faaiuga o se tausaga faaletupe, e tuuina atu ai e le faigamalo se pili i luma o le fono e toe faapolokalame ai tupe totoe, ina ia mafai ai ona faapaleni tusi a le malo.”

 

Saunoa le alii kovana e faapea, o se tasi lenei manaoga e tatau ona ausia i tausaga tupe taitasi, ona o paketi a ni isi o ofisa ma matagaluega a le malo, e ova atu tupe faaaoga nai lo tupe sa paketi, ae o isi ofisa e maualalo tupe faaaoga nai lo tupe sa paketi.

 

I le taumafai ai o le alii  kovana e mulimulita’i i ala o le tulafono, sa ia taua ai, e i ai lona talitonuga e lagolagoina e taitai o le fono lenei taumafaiga, ina ia atagia mai ai se faigamalo e lelei ona pulea, ma toe fo’i atu ai i tausaga ua mavae sa maitauina lava le aofai o tupe na faaalu ma sa totoe, ae o se itu lelei foi e atagia mai ai tulaga faigofie mo le sueina o tusi a le malo.

 

Ona o ia mafuaaga uma e pei ona saunoa Lolo, ua ia tuuina atu ai i luma o le fono se pili tupe i le aofaiga e $4,380,000, mo le toe faapolokalameina mai e le fono.

 

Ao sauni atu ai le fono e iloilo le pili tupe, na taua ai e le kovana e faapea, o le paketi a le malo i le faaiuga o le tausaga tupe lenei mo le taimi muamua, e paleni le paketi a le malo.

 

O se tasi la o auala ua faia e le malo ina ia mafai ai ona ausia le paleni o le paketi a le malo, ua faamalumalu ai e le faigamalo le faaoagaina o le $1.7 miliona, o se vaega lea o le pili mo le paketi toe faaopoopo a le malo na pasia e le fono i le amataga o le tausaga nei.

 

Mai le $4.38 miliona ua tuuina atu e toe faapolokalame mai e le Fono Faitulafono, o le $2.76 miliona e maua mai i tupe a matagaluega ma ofisa a le malo, ma le $1.62 miliona e maua mai i polokalame faapitoa a le malo.

 

O le ofisa pito i tele le tupe o lo o totoe mai ai, o le vaega o Sikolasipi i le aofaiga e $695,000, sosoo ai le ofisa o le kovana sili i le aofaiga e $330,000, ma le Ofisa o le Suetusi o le Teritori e $240,000.

Comment Here