Ads by Google Ads by Google

Valaaulia Matagaluega ma Ofisa Malo auai pesepesega Kerisimasi

O se tusi na tu’uina atu e le ali’i kovana i Fa’auluuluga o Matagaluega ma Ofisa uma a le malo i le vaiaso na te’a nei, o lo o ia vala’aulia ai totino uma o ofisa eseese ma matagaluega a le malo ina ia auai i le polokalama o pesepesega o le kerisimasi, lea ua fuafua e faia i le masina fou i le nofoaga masani i Fagatogo.Na fa’amanatu e le afioga i le matua ia Togiola Tulafono i fa’auluuluga o ofisa uma a le malo i lana tusi e fa’apea, a’o aga’i atu le atunu’u i le fa’amanatuina o le aso na soifua mai ai Iesu Keriso le Fa’aola, e tatau fo’i ona toe fa’amanatu atu i tagata uma le autu moni ma le agaga o le meaalofa mo le kerisimasi i le lalolagi, ina ia mafai ai ona fa’aosofia tagata uma ina ia fa’atino o latou tiute i le agaga ma le fa’amaoni, a’o aga’i atu ai i le fa’aiuga o lenei tausaga.“Talu ai o lenei polokalame ua fai ma polokalama taua, ua avea ai fo’i polokalama mo pesepesega o le kerisimasi i le atunu’u, o se auala e fa’alauiloa atu ai i le agaga moni o le kerisimasi,” o le saunoaga lea a le ali’i kovana i lana tusi.“O se auala ua tatou maua ai avanoa eseese e fa’ailoa ai lo tatou fiafia e ala i fa’amanuiaga eseese mai le Atua, ma fa’atino ai loa lo tatou agaga fiafia e ala mai i pese, tala fa’atino, po’o le fa’atinoina fo’i o taleni eseese i lea aso.”O le Polokalame mo Pesepesega a le malo ua fuafua e fa’atinoina lea mo po e tolu, lea e tatalaina i le po o le aso 14 ae tapunia i le po o le aso 16 Tesema 2011, i le Malae o le Talu i Fagatogo.Ua i ai le finagalo o le ali’i kovana, o matagaluega tetele a le malo o le a feagai lava i latou ma a latou tapenaga masani mo lenei fa’amoemoe, ae o matagaluega ma ofisa e to’alaiti tagata faigaluega e galulue ai, o le a tu’u fa’atasi ina ia mafai ai ona tu’u fa’atasia sa latou aufa’afiafia mo lenei fa’amoemoe.Ua i ai le finagalo o le ali’i kovana e pei ona taua i lana tusi, o le a galulue fa’atasi fa’auluuluga o matagaluega ma ofisa uma a le malo, i le tu’u fa’atasia o lenei fa’amoemoe, ina ia mafai ai ona fa’ailoa atu i le atunu’u le agaga moni o le kerisimasi o lenei tausaga.