Ads by Google Ads by Google

Valaaulia au lakapi mai Samoa taamilosaga taito’a 7 Mosooi

Ua valoia e le taitaifono o le Iuni Lakapi a Amerika Samoa le tele o taaloga lakapi e ao ona maimoa i ai le atunuu, pe afai ae faataunuuina le taamilosaga taitoa 7 a le Mosooi i le faaiuga o le masina nei, ona o lea ua valaaulia au mai Samoa ina ia auai mai i lea faamoemoe.

E pei ona faia ai i tausaga uma, o le vaiaso mulimuli o Oketopa i tausaga taitasi e faamanatuina ai le Vaiaso o le Mosooi i Amerika Samoa, i lalo o le faatautaiga a le Ofisa o Turisi, ma le faamoemoe ia faaauau pea fuafuaga nei ina ia faatosina mai ai tagata tafafao maimoa mai fafo i le teritori.

O nisi o fuafuaga masani mo le vaiaso o le Mosooi e aofia ai le taamilosaga taitoa 7 e pei ona saunoa i ai le afioga i le matua ia Togiola Tulafono.

Na taua e Togiola i luga o lana polokalama i le faaiuga o le vaiaso na tea nei, “O le agaga i le Iuni lakapi a le atunuu, ia maua pea le avanoa e aumai ai au mai Samoa e faa taaalo ma tatou kalapu iinei aemaise ai o le tatou au fili, sei amata ona tofo le vai leaga o lea ua avea tatou ma sui o le IRB, lona uiga foi la e tatau ona faa IRB uma a tatou gaioiga e fai”.

Na taua e se tootoo na valaau atu i le polokalama, e i ai lona talitonuga afai e manatu Amerika Samoa e faatumau lona tulaga o le avea ma sui o le IRB, e tatau foi la ona faa IRB uma amioga a tagata o loo taitaia kalapu lakapi, faa IRB atu ai ma amio a tama taalo ina ia latou lagonaina ai le taua o le avea ma sui o le IRB.

“Aua le fiafia e tau le upu ua avea ma sui o le IRB, ae le o savali ma ola ai faa IRB,” o le saunoaga lea a le tootoo, lea foi na lagolagoina e le alii kovana.

Saunoa Togiola, o le filifilia o le au fili a le atunuu lea na malaga atu i le taamilosaga taitoa 7 sa faia i Ausetalia i le masina na te’a nei. na atagia mai ai lagona le fia IRB o nisi o taulele’a, ina ua filifili atu latou i le au fili a le atunuu ae fai mai e le avanoa.

“O isi fai mai e le avanoa ona o galuega, o isi fai mai e le manaia, ae o isi fai mai e le mananao ai leaga e tigaiga koleniga, a faafefea la ona atina’e le lakapi ma ausia le tulaga maualuga pe afai e fai atu e faavaivai,?” o le saunoaga lea a le alii kovana ma ia toe lu’iina ai tama taaalo lakapi ina ia naunau ma fiafia e faaiila le taleni.

Na taua e le taitaifono o le Iuni lakapi e faapea, e ui lava i le lima vaivai o le Iuni, ae o loo taumafai pea i ni auala e faatosina ai loto o tupulaga i le taaloga lakapi, ina ia tupu ai pea lo latou fiafia i le taaloga, e pei ona faia e isi atunuu tetele o le lalolagi, o le aami lea o tama taalo mai isi atunuu e taalo mo le latou au ae maua ponesi.