O le aoauli ananafi na taua'aoina ai e ta'ita'i o le Fono Faitulafono se poloa'iga mai le afioga i le kovana sili ia Togiola Tulafono, e fa'ailoa ai lona vala'auina o se Fono Fa'apitoa, e talanoaina ai ni isi o mata'upu taua ua ia fa'alauiloa ma le fa'amoemoe e  fesoasoani ai i tulaga pagatia o lo o feagai ma le falema'i o le LBJ i Faga'alu.

I se vaega o le tusi a Togiola i ta'ita'i o le fono sa ia ta'ua ai e fa'apea, “ina ia tusa ai ma le Vaega 2, Maga 8 o le Fa'avae o Amerika Samoa, ua ou vala'auina ai le fono fa'apitoa e amata atu i le aso 12 Mati, mo le umi e le silia i le 30 aso, mo le talanoaina lea o ni isi o mata'upu mo le falema'i o le LBJ.”

O ni isi o mata'upu o lo o aofia i le fono fa'apitoa ua vala'auina e le ali'i kovana e aofia ai le fa'asoasoaina atu lea o le aofa'iga e $10 miliona e fa'atupe ai le polokalama o le Off Island Referral a le LBJ, mo le auina atu lea o gasegase i fafo mo togafitiga.

O le isi mata'upu e fa i ai mata'upu fa'apitoa a le ali'i kovana mo le fono fa'apitoa, e aofia ai le $8 miliona lea o lo o fuafua le kovana e fa'atupe nono mai i le Vaega o le Litaea e tu'u atu mo le LBJ, o le pili e toe fai ai se suiga i le Fa'avae ina ia toe fa'afo'i atu ai le falema'i e fa'afoe e le malo, atoa ai ma le fa'amaoniga o totino o Komiti ma Komisi ua mae'a ona tofia.

I lana tusi na ta'ua ai e Togiola e fa'apea, e i ai lona talitonuga o le a silafia e le fono le taua tele o mata'upu ia ua mafua ai ona ia vala'auina le fono fa'apitoa.

Saunoa Togiola, o le $3 miliona lea na pasia i le tauaofiaga a le fono ua mae'a e tu'u atu ai se fesoasoai mo le falema'i, ua na o se fesoasoani mo se taimi le tumau mo le falema'i, e fesoasoani ai i le tulaga pagatia o lo o feagai ma i latou.

“Afai e i ai se fofo tumau e tu'uina atu mo le falema'i i Faga'alu e fesoasoani ai i le fa'afitauli ma lana tupe fa'asoasoa mo le tausaga tupe lenei 2012, o le a mafai loa e le falema'i ona fa'aleleia atili ma fa'atino lana tautua e ala i le tausia lelei lea o le soifua maloloina o le atunu'u,” o le saunoaga lea a Togiola i ta'ita'i o le fono.

“E le mafai ona tatou fa'atali se'i toe tauaofia le fono i le tauaofiaga lona fa, ona fa'atoa sa'ili lea o se fofo o le fa'afitauli lenei,” o le saunoaga lea a Togiola, fa'atasi ai ma lana folafolaga i ta'ita'i o le fono, o le isi $1.5 miliona lea o lo o totoe e tatau ona tu'u atu mo le falema'i, ua fa'amoemoe e toe tu'u atu i le isi lua vaiaso o lo o lumana'i nei.

Sa ia ta'ua fo'i e fa'apea, o le tupe lea o le a mafai ai ona fa'aauau galuega a le falema'i se'ia o'o atu i le fa'ai'uga o le masina o Aperila, ma afai e taunu'u ia fuafuaga, o le a aga'i atu ina fa'aitiitia fa'afitauli e feagai ma le falema'i i le lumana'i.

E tapunia le tauaofiaga a le fono i le aso ananafi e lei taunu'u se poloa'iga mai le ali'i kovana, peita'i na saunoa le afioga i ta'ita'ifono o maota e lua ia Gaoteote Palaie Tofau ma le Fofoga Fetalai ia Savali Talavou Ale, afai e vala'au e le kovana se fono fa'apitoa, o le a galulue fo'i le fono ina ia mautinoa e taunu'u fuafuaga uma e pei ona ia fuafua i ai.

O le pili e $8 miliona a le  kovana lea na fa'aulu i luma o le fono i le lua vaiaso talu ai, ua faia le fa'ai'uga a le Senate ina ia te'ena ina ua faitauina i lona faitauga lona lua i le aso Lulu na te'a nei.

O le agaga o le Senate e te'ena ai lea tulafono taufa'aofi, na fa'avae lea i luga o se fautuaga mai le Vaega a le Litaea e fa'apea, e le gafatia e le teugatupe a le litaea ona fa'atupe le nonogatupe fou lea o lo o finagalo i ai le kovana.

Na ta'ua e Aleki Sene Sr i lana molimau i luma o le Fono, afai e finagalo i ai le fono i se isi nonogatupe fou mai le litaea, e na o le $6.5 miliona le tupe e gafatia ona totogi, ae le o'o atu i le $8 miliona.

Na ta'ua fo'i e Aleki e fa'apea, afai e finagalo le fono e talia le nonogatupe, e mana'omia ni isi alagatupe fou e totogi ai le nonogatupe fou o le a faia, atoa ai ma le tatau lea ona i ai ni isi meatotino a le malo e tu'u atu ina ia fa'amaonia ai e mafai ona totogi le nonogatupe fou lea.

Sa manatu fo'i le fono ina ia pasia le $2 miliona lea ua toe fa'aopoopo i le nonogatupe e $20 miliona mai le litaea mo le falema'i, peita'i ua le o gatasi fuafuaga a le fono ina ua pasia e le Senate lea tulafono ae faia le fa'ai'uga a le maota o sui, o le a ta'oto atu le pili lea i le komiti mo se isi fa'ai'uga i se taimi oi luma.