E tusa o le tolu vaiaso ua te’a na ulufale mai ai ma taula i le “Fagatogo Marina” le va’a mo folauga, a’oga mo su’esu’ega fa’asaeanisi e feso’ota’i ma le vasa Pasefika,  le Robert C. Seamans, e fa’aautu ana malaga suesue i Woods Hole, Massachusetts. O lea fo’i le Ofisa Autu o le “SEA Education Program” lea e fa’atupea latou malaga ma a’oga ma su’esu’ega fa’apea ma latou folauga.

O le malaga lona lua lenei a le va’a folau ua afea ai le teritori. O le tala mai a le tama’ita’i kapeteni o Pamela Coughlin, “O folauga nei, e feavea’ia ai le fanau a’oga, i le taimi nei e le o i ai le fanau a’oga i luga o le va’a, peita’i ua na’o le to’a 16 o i matou o tagata faigaluega tumau e toe fa’aleleia le tele o mea e mo’omia ona fa’aleleia, e tapena ai le isi fo’i malaga e aofia ai ma le fanau a’oga, i luga o le vasa.”

O le vasega e soso’o mai, ua mae’a fa’ailoa mai, e fa’ato’a ulufale i teritori i le aso 28 Setema 2015, ma e tu’uva’a ese atu i latou i le aso 29 Setema, 2015. I le taimi nei, o lo’o fa’atautaia vasega mo tomai tau su’esu’ega fa’asaeanisi o le sami, a’oga tau folauga, ma a’oga o ituaiga tomai e mo’omia e so’o se tasi i luga o le vasa, lea e faia uma i Woods Hole.

E ta’i 6 vaiaso le umi o folauga ta’itasi, ma o le va’a lenei, o le va’a lona tolu lea a le SEA Education Association, o se sosaiete e le fa’atautaia mo ni polofiti, ae ua fa’apitoa fo’i mo folauga ma suesuega i le vasa Pasefika, e le alu lava i Woods Hole lea va’a.