Ads by Google Ads by Google

VA’A LA’U 'OLOA PA’ULIA I LE VASA

O le vaiaso na te’a sa pa’ulia ai se va’a 'oloa i le oneone e latalata i Wirk aan Zee. O lea va’a o se va’a la’u 'oloa peita’i, ua pa’ulia nei i le gataifale o Netalani e tusa o le 20kilomita i le itu i sisifo o Armsterdam ina ua motu 'ese atu lona taula ona o le louloua o se afa na afatia ai la latou malaga i le po na muamua atu.

O le va’a e leo i ai sana uta, peita’i, o lo ’o tutula’i lelei lea va’a, e le mafuli pe sipa fo’i lana tu, ma ua fa’ailoa mai e i latou na mua’i o’o atu ma sa'ilia ni fa’aletonu e ono lamatia ai le si’omaga ona o le pa’ulia o lea va’a. Ua fa’ailoa mai fo’i, e le o liki fo’i lona suau’u ma le kesi, ae o lo ’o tu matilatila lava i le oneone ua pa’ulia ai.

O lea va’a e 155futu le umi o le ìAztec Maidenî o se va’a la’u 'oloa o lo ’o lesitalaina ma fa’aauva’a e le malo o Filipaina ma e to’a 21 fo’i lona 'auva’a o i ai i luga, i le taimi lava o pa’ulia ai.

O le aso To’ona’i ua te’a sa amatalia ai galuega e taumafai ona toe fa’afo’i ai lea va’a i luga o le sami mai le mea na pa’ulia ai.

E leai ni ripoti e fa’aalia ai se tasi o fa’amanu’alia i lea va’a ma lona tulaga o i ai, ae pau le mea o le toe fia alu ‘ese mai o le va’a i le mea o pa’ulia ai, ma toe fa’aauau lana faigamalaga. E ui lava ina e le o va’aia se liki mai o se suau’u, ae le tu’ua ai le tiute fai o le Coast Guard o le puipuia lea o le siomaga mai lea ituaiga o fa’aletonu e tele ai ni meaola e afaina o latou ola i le suau’u ma le kesi masa’a.

Ua feoa’i fo’i helikopa mo lea fa’amoemoe e taumafai ona va’ava’aia toto’a ni mea e ono tutupu mai i lea va’a, a’o le’i o’o i le taimi e amatalia ai galuega fa’aola.

10 Va’a Magoto i le Gataifale o Take

E to’a 10 tagata ua le iloa mai nei ina ua magoto se va’a 'oloa i le Sami Ulaula i le gataifale o Take. O se ripoti lea ua maua mai i lenei fa’alavelave tau va’a 'oloa leiloa a’o malaga i le sami. Ua fa’ailoa mai fo’i sa i ai se afa na matagitaumuaina ai lenei faigamalaga  ma ua afatia ai le va’a 'oloa.

O lenei va’a o le ìVeraî o lo ’o lesitalaina lea i le malo o Cambodia na malaga mai Rusia se’i aga’i mai i Take e fia tuta i le Uafu i Aliaga, peita’i, o lea ua magoto nei o se afa e pei ona lipotia mai.

O i latou ua le maua nei, ua fa’ailoa mai o tagatanu’u o Polani ma o lo ’o fa’aauau pea lava sa'iliga. Ua fa’ailoa mai e to’alua le auva’a ua mae’a fa’asaoina, ma ua fa’aalia fo’i o lo 'o sa'ilia lava le to’atele o misia pea. O le gataifale tonu lava o le a’ai o Zonguldak, Take lea sa magoto ai lea va’a.   

E o’o atu i ai le vaega a le Coast Guard a Take, ua le maua atu le va’a ua magoto lava, o se tala lea a le ali’i ta’ita’i o le Sosaiete a le 'Aufaipisinisi a lea malo, Irfan Erdem, na fa’ailoa ane i le 'au fa’asalalau. O se fa’amatalaga o le tetele na’ua o galu ona o le malolosi o matagi o le afa, na fa’atafa loa le va’a ona o le mamafa o lana uta ua mase’e uma i le isi itu, na amata ai loa ona alu le vai i totonu o le va’a, ma ua le toe mafai ai loa ona fa’asao mai ae ua magoto atu ai lava.

I lenei lava vaitau, ua matua tetele lava afa ma matagi malolosi o lo ’o a’afia ai le malo o Take ma ua fa’apea fo’i ona afaina atu ai ma Europa i sasa’e.

 saunia: Leua Aiono Frost